Nan yon kominike, Medsen San Fwontyè (MSF) mete leta okouran tout difikilte ki genyen pou yo rive jwenn medikaman yo ki rantre sou teritwa a akoz pò yo ak ayewopò yo ki bloke nan peyi a depi mwa mas ki sot pase a, madi 22 me 2024 la.
«Òganizasyon medikal sante a mande pou gwoup gang ak zam yo gen pitye epi yo mande otorite nan ladwàn yo pou yo fè tout sa a ki posib pou fasilite livrezon ak kontribisyon esansyèl materyèl medikal li yo.» se sa a ki ekri nan kominike Medsen San Fwontyè a.
Sitiyasyon ensekirite a touche ata menm operasyon medikal Medsen San Fwontyè (MSF) konn fè. Depi lè pò ak ayewopò entènasyonal Tousen Louvèti a fèmen an, òganizasyon sante sa a pa kapab fè medikaman ak ekipman medikal rantre nan peyi a ankò.
Nan sans sa a, òganizasyon sante sa a lanse yon apèl ijan bay gwoup ak zam yo epi ofisyèl ladwàn yo pou penmèt yo bay sant ak lopital li yo aksè ak materyèl medikal li yo. Puiske, MSF rete kwè popilasyon sivil yo, patikilyèman pasyan yo gen yon bezwen ijan pou tretman .
Òganizasyon MSF ajoute pou l di : «Si nou pa resevwa ekipman medikal nou yo nan 2 semèn k ap vini yo, n ap oblije diminye kantite operasyon nou te konn fè yo», se sa a chèf misyon Medsen San Fwontyè, Mumuza Muhindo Musubaho, menm ajoute pou l di :«Òganizasyon an te ogmante kapasite repons li pou fè fas ak kantite pasyan yo admèt nan sant sa yo, men pou kounye a n ap fè fas ak yon mank estòk medikaman.»
Pou fini, MSF ap fè konnen y ap fè fas ak yon ijans imanitè, sila yo ki gen maladi kwonik yo tankou tibèkiloz ak VIH gen risk pou yo vin pi grav si anyen pa janm fèt. Malgre ayewopò entènasyonal Tousen Louvèti a louvri pòt li, nou rete kwè yon kowoperasyon pi laj nesesè pou akselere pwosedi ladwàn yo.
Atik sa se pwopriyete prive ©️ Gwoup Medya MAGHAITI 2024
