Kersaint Dumesky, jounalis epi kolaboratè Radyo Tele Inurep tonbe anba bal moun yo pa rive idantifye samdi ki sot pase a, nan Mawotyè 83, komin Kafou. Se yon nouvèl ki ogmante lapèn fanmi an puiske sa pa gen lontan depi yo pèdi youn nan pwòch yo, selon sa fanmi an fè konnen nan mikwo laprès.
Daprè enfòmasyon yon kòlèg viktim lan bay Mag Haïti, jounalis la jwenn lanmò l pandan li t ap pase nan zòn kote nèg ak zam t ap opere. Sitiyasyon sa lakòz gen 5 lòt moun ki ta mouri tou menm jou ki te samdi 15 avril 2023 a. Nan sans sa, fanmi viktim lan patikilyèman papa l kise Thony Kersaint eksprime l ayè dimanch 16 avril 2023 a, pandan li fè konnen se pa t janm yon metye li te vle pou pitit li.
“Kelly kite nou nan yon sikonstans m pa t atann ak li. Jounalis la se pa t yon bagay m te vle pou li men se te vokasyon misye. Nan samdi maten m t al chache jwenn ak li pou m te di l ann monte Leyogan pou kèk jou, men li te di m pa gen pwoblèm kote l ye a, lè sa on ti jan l ap rele m vinn chache l”, daprè sa papa a deklare nan mikwo laprès ayè dimanch la.
Pou kounya, pa gen okenn lòt enfòmasyon ki disponib sou kilès vrèman ki ta koze zak sa. Konsa, plizyè pwòch travayè laprès la ta denonse bandi ak sitiyasyon ensikirite ki nan peyi a ki lakòz tout kouch nan sosyete a sible e ki lakoz yo rive pèdi Kersaint Dumesky.
Atik sa se pwopriyete prive ©️ Gwoup Medya MAGHAITI 2023
