Plizyè santèn moun nan Miragwàn tanmen yon gwo manifestasyon jodi mèkredi 31 me a, nan lide pou pwoteste kont responsab nan Leta ki ta vle transfere komisè Muscadin nan depatman Sidès peyi a. Daprè sa kèk sitwayen di, komisè a pap fè yon pa pou kite depatman Nip la.
Sou tout pakou a, plizyè chofè moto ak lòt moun nan popilasyon an ak fèy bwa nan men yo, pandan yo fè konprann se chèf gouvènman an ki ta dwe kite tèt peyi a olye se komisè Muscadin yo vle pou transfere. Yo eksplike se travay komisè a ki pèmèt depatman an pa gate ak gang paske ak chèf sila se zewo tolerans pou nèg ak zam.
“Komisè Muscadin pap fè yon pa, si jounen jodi a nou ka alèz pou n mache se gras ak li. Nou pa nan bagay pataje ni transfere l kit se te Pòtoprens oubyen Jakmèl“, se deklarasyon youn nan chofè moto yo ki nan tèt kole ak popilasyon Miragwàn nan voye yon mesaj klè pou responsab lapolis la “yo mèt kenbe blende a nou menm nou ka achete l bay komisè a”.
Nan moman n ap ekri la, popilasyon an toujou rete mobilize nan lari a epi rete fèm pou pwoteste kont desizyon sa. Li rete kounya pou konnen si responsab lapolis yo ta toujou vle transfere komisè gouvènman Miragwàn nan, Jean Ernest Muscadin nan depatman Sidès.
Atik sa se pwopriyete prive ©️ Gwoup Medya MAGHAITI 2023
