Lidè platfòm Pitit Desalin lan felisite, jodi jedi 8 septanm lan nan konferans pou laprès nan lokal Efrayim dèma 41,tout vil ki leve kanpe pou manifeste kont lavi chè, rate gaz, kont bank yo ki toujou kenbe pri dola a byen wo, epi kont gouvènman Ariel Henry a.
Pandan gwo manifestasyon t ap fèt nan peyi a, ayè mèkredi 7 septanm lan, premye minis lan te pito ale Florid pou rankontre ak kèk envestisè jan sa te mansyone nan yon twit laprimati te fè. Ansyen senatè a deklare “Doktè Ariel Henry se yon iresponsab ki pa menm ka mete lapè nan peyi l epi ki pretann al rankontre envestisè”. Moïse Jean-Charles pa t kache di premye minis lan se ak patron l li al pale.
Ansyen kandida pou pòs prezidan an anonse pandan konferans sa a, mobilizasyon yo pap kanpe nan peyi a toutotan revandikasyon pèp la pa pase. Lidè a te tou profite mande pou popilasyon an leve barikad yo pi wo epi pou yo kontinye voye dlo sou bank yo.
Ansyen senatè a envite pèp ayisyen an pou yo defann tèt yo jan yo kapab, pandan y ap tann Ariel Henry retounen nan peyi a, vandredi 9 septanm, pou yon lòt gwo mobilizasyon. Li kontinye pou l di antanke gran nasyon nou ye nou paka tolere bank yo k ap kase ponyèt sitwayen yo.
Lidè platfòm Pitit Desalin lan pa sèlman sible bank yo men li te limen pwojektè l sou “gwo zouzoun” k ap enpòte produi alimantè yo, ki daprè li menm monte produi yo byen wo. Li poze yon iltimatòm pou yo tout desann pri produi yo nan jou k ap vini la yo.
Moïse Jean-Charles raple tout ayisyen pou yo pa atake moun ki nan menm sitiyasyon ak yo. Men pou yo konnen se bank yo, ak 7 fanmi ki kenbe pèp la nan gagann. Li di tou tan lagras la pase pou tout kriminèl sa yo, li ajoute pou l di pèp la “kontinye leve kanpe pandan y ap mete yon ti piman nan leve kanpe yo“.
Atik sa se pwopriyete prive ©️ Gwoup Medya MAGHAITI 2022
