Jounen jodi mèkredi 31 dawout 2022 a, nan yon entèvansyon li t ap fè sou radyo Magik 9, lidè Pati Politik Pitit Desalin nan Moïse Jean Charles anonse plizyè manifestasyon nan Okap pou semenn sa a, ak yon lòt nan Pòtoprens nan dat 7 septanm 2022 a.
Akoz sitiyasyon peyi a, moun Okap te leve kanpe yè madi a pou di non ak grangou, ensekirite, ratman gaz, lavi chè, elatriye. Nan sans sa a, Moïse Jean Charles anonse mobilizasyon an ap kontinye pou rès semenn nan.
Ansyen palmantè Moïse Jean Charles deklare :” Desizyon ki pran yè a, moun yo di tout tan dola a pa bese pi ba 100 goud, y ap nan lari a. Yo te la yè, y ap la jodi a, demen, jedi, vandredi. Aprè sa m ap retire kò m, m p ap nan lari a ankò. Se moun yo ki pral mobilize pou kò yo. Pou 7 septanm n ap nan kapital la, men se tout peyi a ki pral mobilize”.
Plizyè manifestasyon te deja òganize nan peyi a pandan semenn sa, tankou Tigwav, Dèlma, Petyon Vil, elatriye. Kote moun yo pa sispann kriye kont ensekire ak ratman gaz epi menm mande pou Premye minis defakto Ariel Henry demisyone.
Ansyen palmantè Moïse Jean Charles te kontinye pou li ajoute :” Dola dwe bese, Bank Santral dwe mete yon lòt sikilè deyò pou yo bay moun yo lajan yo an dola lè fanmi yo fè transfè pou yo epi retire 1.50 dola l ap pran sou kòb transfè a. Anplis se pa bank yo ki pou bay to jounen an pou Bank Santral ap vin konstate”.
Lidè Pitit Desalin lan Moïse Jean Charles kontinye ap fè deklarasyon pou relanse mobilizasyon li yo, pandan tan sa a, Bank Santral sou lòt bò a ap mete dola sou mache a pou li ka eseye redui nivo enflasyon an. Anplis, Ministè komès ak endistri di l ap mennen envestigasyon sou pri pwodui k ap monte tèt nèg sou mache lokal la.
Atik sa se pwopriyete prive ©️ Gwoup Medya MAGHAITI 2022.
