Nan yon nòt li soti jodi 3 jen an Ministè Edikasyon Nasyonal ak Fòmasyon Pwofesyonèl (MENFP) vle raple desizyon ki te entèdi seremoni gradyasyon yo nan nivo preskolè ak nan klas entèmedyè nan lekòl fondamantal sou lobedyans li toujou kenbe.
Toujou nan menm nòt sa, ministè a otorize senpman seremoni gradyasyon nan dènyè ane lekòl fondamantal (9èm ane fondamantal ak dènyè ane ki se segondè 4).
Pandanstan, Ministè Edikasyon ak Fòmasyon Pwofesyonèl (MENFP ) pa dakò okenn direktè lekòl sanksyone okenn timoun lekòl ki pa deside patisipe nan gradyasyon, pwiske li pa obligatwa pou paran yo. Sesi tout fwa paran vle, yo ka rive patisipe ladan li.
Diplis, li raple nou desizyon sa te deja enskri nan kad yon sikilè ki te deja pibliye nan dat 16 oktòb 2014, se yon fason pou li te frennen kèk deriv anndan lekòl yo, sitou direktè ki t ap egzije paran gwo tonton lajan pou koze gradyasyon sa, plis presizeman timoun nan klas preskolè.
Kidonk, ministè a rekòmande ak direksyon depatmantal edikasyon avèk respektè lekòl yo pou yo rete vijilan nan lide pou fè aplike desizyon sa jan li dwe ye.
© Tous droits réservés – Groupe Média MAGHAITI 2022
