Aprè tout enkyetid pwodiktè dominiken yo te genyen pou yo te sispann pèdi ze y ap pwodui yo akòz fwontyè terès ayisyano-dominiken ki fèmen an, jodi vandredi 29 septanm 2023 a, ministè agrikilti rive siyen yon akò ak gwo pwodiktè yo pou achte tout ze y ap gen pou pwodui yo, selon Listín Diario.
Nan lide pou jwenn yon solisyon ak plizyè milye ze k ap pouri chak jou lòt bò fwontyè a, minis agrikilti yo a, Limber Cruz fè konnen depi kounya yo pran rezolisyon pou achte tout ze yo nan men pwodiktè yo. Selon enfòmasyon jounal la bay, yo fè kwè otorite yo ap achte machandiz yo nan pri (4.5 peso) machann yo konn vann li deja.
“Nou vle anonse tout pwodiktè ze yo Asosiyasyon Dominikèn moun k ap fè Volay yo(ADA), ap resevwa tout ze epi ap tou peye sou plas”, selon sa minis yo a di.
Daprè sa fonksyonè leta a soulinye, gen enstiti nasyonal estabilite pri yo ak enstiti nasyonal pwoteksyon sosyal etidyan yo ki ap la yo menm pou bay tout ze sa yo. Avèk pwosesis sila, yo prevwa gen 8 milyon ze moun yo ap manje chak semèn sa ki ap diminye risk pou ze yo ta gate nan depo menm jan sa gentan fèt pandan jou yo.
Pou semèn sa, yo di y ap achte 4 milyon ze, yon chif ki ka ogmante nan jou k ap vini yo selon Iván Hernández Gúzmán. N ap raple gen nan gwo pwodiktè sa yo ki prevwa 2 oktòb k ap vini la, al mete plizyè milye ze pouri nan pye moniman peyizan yo nan zòn Moca, nan objektif pou pwoteste kont desizyon gouvènman dominiken an te pran pou te fèmen fwontyè yo.
Atik sa se pwopriyete prive ©️ Gwoup Medya MAGHAITI 2023
