Depi aprè demisyon premye minis defakto Ariel Henry ki te fèt ofisyèlman nan dat 25 avril dènyè a ak nan moman konsèy prezidansyèl Tranzisyon an te fin enstale a, minis finans ak ekonomi, Michel Patrick Boisvert, te nan pòs la kòm premye minis enterimè. Jounen jodi samdi 25 me 2024 la, Konsèy Prezidansyèl Tranzisyon an deside kontinye manda li pou 1 mwa ankò nan tèt gouvènman an.
Konsèy Prezidansyèl Tranzisyon(KPT)an ki toujou nan pwosesis pou li chwazi yon premye minis pou vin akonpanye prezidan Edgard Leblanc Fils nan pouvwa a, parapò ak reta pou chwazi premye minis sa a li oblije kontinye manda premye minis enterimè a ak tout lòt rès minis li yo.
Pandan tan sa a, n ap raple Michel Patrick Boisvert te jwenn nominasyon l antanke minis Ekonomi ak Finans (MEF) nan dat 5 mas 2020 sou direksyon premye minis Ariel Henry. Premye minis enterimè aktyèl la gen yon metriz nan jesyon ak politik ekonomik nan inivèsite «Auvergne en France», apati Sant Etid ak Rechèch pou Devlopman Entènasyonal (CERDI).
Yon lòtbò, Konsèy Prezidansyèl Tranzisyon (KPT) an anonse ap gen yon deba k ap fèt sou chwa nouvo premye minis la nan dat 28 me k ap vini la devan 3 jounalis konpetan nan peyi a pou vin debat sou chwa premye minis lan pami 5 ki chwazi yo, selon jounal Radio télé Métronome.
Pou fini, n ap soulinye Konsèy Prezidansyèl Tranzisyon (KPT) an pa sèlman renouvle manda premye minis enterimè, Michel Patrick Boisvert. Atravè yon kominike pou laprès, Konsèy la tou pwofite voye senpati l bay fanmi viktim 2 misyonè Ameriken yo epi Ayisyen ki te jwenn lanmò anba men bandi ak zam nan jou jedi 23 me 2024 la, nan lokalite Lizon.
«Nou kondane ak tout fòs nou zak sa yo k ap repete (Banditis) nan plizyè rejyon nan peyi a, presizeman nan zòn Pòtoprens lan».
Atik sa se pwopriyete prive ©️ Gwoup Medya MAGHAITI 2024
