Nan yon atik New York Times pibliye madi 21 me 2024 la, yo revele ansyen prezidan Michel Joseph Martelly ta bay manm Konsèy Prezidansyèl Tranzisyon yo presyon pou fòmasyon nouvo gouvènman ki gen pou fèt la. Selon yo menm, ansyen chèf leta a jwe tout kat pou l kapab blanchi gang yo.
«Kèk responsab ki okouran sou negosiyasyon k ap fèt yo pou nonmen yon nouvo Premye minis ayisyen te deklare Martelly te fè presyon sou dirijan karayibeyen yo ak alye politik li yo pou tante enfliyanse konpozisyon gouvènman enterimè a», daprè sa a jounal ameriken an fè tout moun konnen.
Pou montre enplikasyon ansyen prezidan an nan magouy pou pouvwa, New York Times di gen gwo reyinyon patizan l yo fè pou bout ak misyon yo.
«Alye l yo ki nan Konsèy tranzisyon an fè pwopozisyon an kachèt sou iminite ki ta dwe bay an favè gang yo», anplis sa yo, yo deklare ta gen pwopozisyon ki fèt tou an favè manm gouvènman pase yo ki ta gen men yo tranpe nan kòripsyon. Yo eksplike tou, se yon fason ki pi laj y ap chèche pou kapab lave tout move zak moun sa yo te fè nan leta a pandan yo te an fonksyon.
Menmsi rapò ekspè Nasyonzini yo te pibliye nan ane 2023 a te enplike l kòm moun ki ta non sèlman kreye gang epi ki gen relasyon ak bandi, ansyen kandida pati politik Tèt Kale a demanti pou jounal ameriken an tout pawòl sa yo pou l di: «M pa t janm gen relasyon ak gang e m pa t janm pale koze amnisti pou pèsòn». Se nan sans sa a tou, li te pwofite voye jete tout akizasyon ki ta fè kwè li ap enpoze 9 manm Konsèy Prezidansyèl Tranzisyon an ki chwa pou yo fè pou peyi a.
N ap raple, Michel Joseph Martelly gen akizasyon ki peze sou do l kòm moun ki ta konplis nan detounman byen piblik. Epi nan divès sanksyon kominote entènasyonal la te bay yo, Kanada li menm te deside sanksyone l puiske yo estime l gen bon relasyon ak gang nan peyi a.
Atik sa se pwopriyete prive © Gwoup Medya MAGHAITI 2024
