Nan yon kominike Ministè Edikasyon ak Fòmasyon Pwofesyonèl (MENFP) sòti jodi jedi mas 2024 la, li kondane avèk tout fòs zak kraze brize kont lekòl ak inivèsite ki se poto mitan tout sosyete.
Ministè Edikasyon Nasyonal la defann pou li di “Atake lekòl ak inivèsite, detui achiv yo, boule lekòl ak inivèsite, kraze brize materyèl lekòl ak inivèsite, se detui manm prensipal yon sosyete, se detui poto mitan yon kay ki pèmèt tout sosyete a kanpe djanm pou prepare avni timoun ak jèn yo epi avni peyi a“.
Pandanstan, enstitisyon ki responsab edikasyon an pwofite pou raple dènyè zak dife ki te mete nan lekòl Miks «Frère Nau» ak lekòl Nòmal Siperyè jounen jodi a, kote yo menm fè konnen lekòl nòmal se youn nan pi gwo ak pi ansyen enstitisyon k ap fòme pwofesè nan peyi a k ap bay nou sèvis kit nan lekòl prive kit nan lekòl piblik.
Nan menm sans sa, bandi ak zam piye deja Fakilte Syans ak lekòl Nasyonal Atizan epi lekòl «Sage Femme» nan ri Monsenyè Giyou pandan semèn pase yo. Yo sakaje Fakilte Dè Syans ak Fakilte Agronomi ak Medsin Veterinè (FAMV) anplis divès famasi ak klinik yo piye ayè mèkredi 27 mas la.
“Pa gen peyi san edikasyon, pa gen edikasyon san lekòl, lekòl ak inivèsite se tanp konesans ak limyè pou ede tout sosyete vanse, sitou sa ki pi fèb yo. Gras ak lekòl, tout timoun ka rive reyalize rèv yo. Li lè li tan pou zak kraze brize yo sispann sou lekòl yo ak inivèsite yo“, toujou daprè sa yo ajoute nan nòt sila.
Pratik vyolans gang yo kontinye ap fè mal avèk enstitisyon prive ak piblik. Kote nan yon lòt bò divès komisarya ak prizon deja kraze ak piye nan zòn Metwopolitèn nan. Men bò kote responsab MENFP yo, yo peze pou fè konprann nan kèlkeswa sikonstans la lekòl yo ak dwa levasyon timoun yo dwe pwoteje tout tan.
“Ministè Edikasyon Nasyonal Fòmasyon Pwofesyonèl pwofite voye senpati li bay tout viktim nan sosyete a k ap sibi atak sa yo ak zak kraze brize sa yo. Nan sans sa a, MENFP pwofite voye senpati l bay fanmi Maurice Antoine, youn nan pi ansyen kad nan Ministè a, kontab Biwo Sekretè Leta Alfabetizasyon, bandi yo touye jodi jedi 28 mas la», pou fini avèk kominike a.
© Tous droits réservés – Groupe Média MAGHAITI 2024
