Yon jou aprè rapò ankèt Direksyon Santral Polis Jidisyè (DCPJ) te revele gen 5 jounalis ki ta nan travay ak gang, Me Arnel Remy ki se avoka k ap defann jounalis yo reyaji. Se sa ki fè antanke defansè dwa moun li estime rapò a gen gwo konsekans sou defans dwa sitwayen sa yo.
Entèvansyon avoka a vini sou temwanyaj jounalis Yvener Silla Phanor ki site non mesyedam yo kòm asosye l nan moun ki konn nan kouvri dosye gang. Se pou sa, nan konferans pou laprès yo bay jodi mekredi 21 dawout 2024 la, atravè Me Arnel Rémy, avoka a defann lalwa pa entèdi pyès jounalis k ap fè travay li pa al kouvri yon aktivite yon chèf gang ap fè.
Me Arnel Remy eksplike pwoblèm nan ka vini se si jounalis la devlope lòt rapò ki pa nan kad travay li ak gang.
“Sa yo di nan rapò DCPJ an lè m ap kesyone tèt mwen antanke avoka mwen di tèt mwen gen yon pwoblèm. Kounye a li te ka pwoblèm se si jounalis la kite kad jounalistik li pou chita ak gang nan manje ak li”, daprè deklarasyon defansè dwa moun nan.
Nan sans sa, avoka a deklare libète endividyèl jounalis yo menase. Sitou Biwo zafè kriminèl mande lajistis mete manda rale mennen vini kont konsène yo.
Pandantan sa, nimewo 1 “ADVOCATUS Law Firm”, ki se kabinè mèt Arnel Rémy an, an fè konnen kliyan li yo disponib pou reponn kesyon lajistis, pwiske yo pa konnen yo konn nan okenn aktivikte kriminèl jan lòt konfrè a akize yo a.
Pou defann pi byen 5 kliyan li yo, Arnel Rémy anonse li pral inisye yon aksyon an « abéas corpus préventif ». Li deside aji konsa se akoz gen gwo menas sou libète jounalis yo ki anpeche yo ale lib libè nan aktivite yo jounen jodi a.
Pou fini, li fè konnen rapò sa ki pibliye a deja koze anpil dega nan lavi jounalis yo. Nan bò pa li li pwomèt pou mennen aksyon lajistis nan lide pou anpeche dwayen tribinal premyè enstans lan pa rive arete jounalis yo.
Matiado Vilmé, Yvenson Jourinvil, Stanley Jaccis, Mackendy Victor, Manno ak Machann zen Ayiti se moun sa yo jounalis Yvener Sylla Phanor revele ki konn al nan dosye bandi avè l.
Atik sa se pwopriyete prive ©️ Gwoup Medya MAGHAITI 2024
