Malgre li te derefize parèt 2 fwa douvan lajistis ayisyen, jij enstriksyon Walter Wesser Voltaire jwenn ansyen premyedam nan, Martine Moïse ta youn nan responsab asasinay prezidan Jovenel Moïse la. Selon òdonans la ki pibliye ayè lendi 19 fevriye a, gen temwen kle ki rive rapòte Martine Moïse te konnen lanmò a e te menm gentan ap prepare l pou pran plas mari l la.
Temwen an ki se ansyen sekretè jeneral palè nasyonal la, Lyonel Valbrun
fè konprann madan defen prezidan an te ap fè gwo preparasyon pou ranplase l aprè lanmò l. Se sa ki fè, 2 jou aprè krim nan jou ki te 9 jiyè 2021 an, Madan Moïse te rele l pou bal presyon nan lide pou pat bare wout la pou ansyen premye minis Claude Joseph, puiske li se moun ki ta pral ede l rive nan tèt leta a.
“Jovenel pa te fè anyen pou nou, fòk ou louvri biwo prezidan an bay Ti Klod pou l fè yon konsèy minis, li pral fè eleksyon nan twa mwa pou m ka vini prezidan, se kounya nou pral gen pouvwa“, selon pawòl madanm nan, ansyen fonksyonè leta a te rapòte jij la.
“Daprè temwanyaj nou jwenn bò kote ansyen sekretè jeneral palè nasyonal la, Lyonel Valbrun nan dat ki te 16 novanm 2023, nan chanm enstriksyon kriminèl nou, li te fè konnen ansyen premye dam nan, Marie Étienne Martine Moïse te ale palè nasyonal 2 jou avan asasinay prezidan Jovenel Moïse la, kote l te pote ale divès bagay, yon rasanblay ki te dire prèske 5èdtan, sòti 10è nan aswè 5 jiyè a pou rive nan 3è nan maten 6 jiyè 2021 an”, selon sa jij la di nan dokiman an espesyalman nan pati ki pote non “Responsablite penal Marie Étienne Martine Moïse” la.
Nan menm pati sa, majistra a peze sou kèk pawòl pou di aksyon sa madanm nan te komèt nan palè nasyonal la, pa t fèt konsa konsa. Se pou sa, li estime se pito yon bann siy ki te anonse yon gwo evènman ki se asasinay prezidan an. Yon lòt kote, jij la montre ak klè gwo dout li genyen sou pawòl Martine Moïse te deklare pou di se anba kabann nan li te al kache, alòske nan konsta yo majistra a di, pou jan kabann nan fèt la menm yon rat nan 35-45 santimèt pa t ap ka antre la alevwa pou madanm nan.
Pou sa ki gen pou wè ak plent avèk konstitisyon pati sivil madan ansyen prezidan ayisyen an te depoze jou ki te 6 oktòb 2021 an nan pakè Pòtoprens, Jij Walter Wesser Voltaire pran desizyon pou pa kenbe plent la, paske ankèt ki mennen yo jwenn okontrè Martine Moïse se youn nan moun ki ta responsab lanmò mari l. Plent sa te depoze, se nan kad pou te fè konprann yo te fè tantativ asasinay sou li tou 7 fevriye sa, sa ki te ka ba li dwa pou lajistis voye je sou ka pa l la tou.
N ap raple, li menm ak 2 pitit li yo Jomarlie ak Jovenel Junior Moïse te depoze yon plent tou kont 11 akize nan tribunal amerikèn. Nan deklarasyon avoka fanmi an, Paul Turner te fè bay jounal Miami Herald, ak plent sa, yo te vle pou non sèlman tout responsab yo ale nan prizon, men tou yo te vle pran tout sa yo posede kòm byen ak aksyon.
Atik sa se pwopriyete prive ©️ Gwoup Medya MAGHAITI 2024
