Nan lide pou montre yo vle etabli lapè nan peyi a, manm Konsèy Prezidansyèl Tranzisyon an (KPT), nan yon dokiman yo ekri, pwomèt y ap mete tèt yo ansanm pou retire Ayiti nan kriz li ye a. Se pou sa a, yo fè kwè y ap fè tout sa yo kapab pou akò sa ki siyen an kapab respekte pandan tout peryòd y ap fè nan tèt peyi a.
«Pati yo angaje yo pou travay ak bon entansyon yo pou retire peyi a nan kriz sa a. N ap fè l nan yon anviwonman ki gen vi sitwayèn ant sektè yo ak manm konsèy la. N ap ranfòse solidarite nan mitan manm yo yon fason pou devlope kapasite travay ansanm nan pou kapab reponn ak revandikasyon sitwayen yo», daprè pawòl ki ekri nan atik 46 dokiman ki pote non “Akò Politik pou yon tranzisyon pasifik epi nan lòd”.
Nan sans sa a, anplis fòmasyon konsèy Elektoral Pwovizwa ak 9 reprezantan yo te di y ap fè a, yo fè konnen y ap mete sou pye yon asanble k ap dakò travay tou. Selon sa yo di, asanble sa ap gen 3 manm kalifye ki ap travay pandan yon peryòd tan, e yo di moun sa yo ap sòti nan 9 reprezantan divès sektè yo te chwazi yo.
Nan yon bò, yo fè konprann asanble sa ap gen pou misyon pou l veye sou bon dewoulman ak sa ki pou fèt nan akò a, kontinye ak negosiyasyon yo pou ka bout ak eleksyon yo. Nan yon lòt bò, estrikti sa ap la pou fè konsèy prezidansyèl tranzisyon an rekòmandasyon, epi fè yon komisyon konsilyasyon (9 moun) nan tèt kole ak konsèy la. Komisyon an li menm ap la pou jere antant ant divès moun nan tranzisyon an.
Pou fini, yo eksplike divès mezi yo pran pou peryòd tranzisyon an. Pami dezisyon sa yo, yo site : «Pyès moun sa yo p ap ka kandida nan eleksyon k ap gen pou fèt yo, Konsèy la ap chache mwayen pou rekanpe trezò piblik la, aprè dat enstalasyon yo a, manm Konsèy la ap gen 30 jou pou depoze pyès yo (sètifika polis, deklarasyon enpo, sètifika deklarasyon patrimwàn)».
Atik sa se pwopriyete prive ©️ Gwoup Medya MAGHAITI 2023
