Otorite nan peyi Etazini anonse ayè jedi 9 fevriye 2023 a, gen 114 migran Ayisyen ki debake nan kot Florid la. Pami sitwayen sila yo, ki ta premye gwo gwoup ki rive nan espas Ameriken an, responsab yo fè konnen ta gen timoun, fanm epi yon bon kantite gason ki te sou ti bato a.
Walter Slosar ki se ajan patwouy an chèf operasyon «US border patrol Miami», te fè anons lan sou kont twitè li kote l te di “gen 114 migran ki sòti Ayiti, nou pral transfere yo nan yon lokal «border patrol» kote yo pral trete yo”.
Nan menm sans sa, otorite britanik yo te anonse, pandan jou pase yo gen an total 69 migran Ayisyen polis wayal zile Tik ak Kayik la te kenbe, alòske responsab zile sa fè konnen depi yo jwenn migran ki san papye ki al eseye antre sou teritwa yo a, y ap tou depòte yo aprè kèk fòmalite y ap fè yo aplike.
N ap raple migran yo espesyalman, Ayisyen yo ak Kiben yo pa sispann pran wout lanmè, malgre gouvènman Biden lan louvri yon pwogram imanitè ki ta dwe penmèt 30 000 migran Ayisyen, Kiben, Nikaragweyen epi Venezwelyen jwenn opòtinite pou yo antre Etazini chak mwa.
Photo: Centre Info
Atik sa se pwopriyete prive ©️ Gwoup Medya MAGHAITI 2023
