Nan lide pou fè fas kare ak otorite Wanament yo ki kenbe fwontyè Ayiti a fèmen, majistra Dajabón nan, Santiago Riverón Arias, entèdi depi jodi lendi 4 desanm 2023 a, tout machann legim ayisyen pou pa vinn vann nan mache legim yo a. Selon N Digital, fonksyonè leta a deklare si tout fwa yon ayisyen ta vle fè komès se pou l al fè l sou fwontyè nan bò Ayiti a pito.
“Li pa posib pou fwontyè bò kote ayisyen yo fèmen sou lòd otorite l yo epi pou gen anpil ayisyen k ap fè komès sou teritwa sa. Tout ayisyen ki vle fè komès ap ka fè l sèlman sou mache fwontalye a kote otorite minisipal peyi yo ap ka defann yo pi byen“, se sa responsab dominiken an deklare, pandan l fè konprann komèsan nan zòn li a dakò ak desizyon sa li menm ak meri Dajabón nan pran an.
Nan menm sans sa, li tou pwofite voye yon pinga bay pwopriyetè lokal nan mache legim zòn nan, kote li entèdi moun sa yo lwe, oubyen vann ayisyen komès. E li konseye yo tou, pou mete deyò tout migran ayisyen ki konn vinn vann nan mache a.
Pandantan sa, otorite dominiken yo fè yon fason pou ogmante chif sòlda ki konn genyen nan prèske tout kwen nan Dajabón, puiske kèk ajan polifwont te deside al kraze ayè dimanch 3 desanm nan, yon mache kontrebann komèsan dominiken yo te monte sou fwontyè a.
Atik sa se pwopriyete prive ©️ Gwoup Medya MAGHAITI 2023
