Nan eleksyon ki te genyen ayè dimanch 19 me 2024 la, Luis Abinader rive genyen l epi tou pran yon dezyèm manda prezidansyèl an Repiblik Dominikèn. Selon divès medya dominiken, jounen elektoral la te pase san pwoblèm men kèk obsèvatè nan Òganizasyon Eta Ameriken (OEA) ki te la te deklare òganizatè yo te fè anpil erè nan pwosesis elektoral yo.
«Pwosesis elektoral la fèt san pa gen okenn pwoblèm ki pase», daprè deklarasyon prezidan konsèy elektoral Santiago a, Haime Thomás Frías Carela. Si nan vil Santiago, San Francisco de Macorís, Puerto Plata, Bonao tout bagay te pase byen kote kèk elektè pa t la nan biwo yo, nan kèk lòt vil lapolis te arete plizyè endividi ki te vle vote nan fason ilegal.
«Eleksyon prezidansyèl ak palmantè ki fèt la, li te gen goumen ladan l, sa ki gen rapò ak kat idantite pati pouvwa a ak opozisyon an t ap achete, nan pwovens El Seibo ak Hato de Mayo», selon sa Diario libre te rapòte.
Yon lòt kote, moun ki nan opozisyon yo pase devan pou denonse Pati Revolisyonè Modèn nan (PRM) ki ta enplike nan zak sa a anplis yo fè konprann yo te enpoze politik yo nan kèk kay yo te lwe.
Pi devan, yo fè konnen lapolis dominikèn arete anviwon 4 endividi nan lokalite Juma Bejucal, ak Montecristi. Selon jounal la, fòs lòd yo arete moun sa yo akoz yo t al achte kat idantite toupre biwo vòt yo e nan moman eleksyon yo. Nan sans sa a, patisipasyon sitwayen dominiken an fè kwè yo jwenn 16,6% sikonskripsyon elektoral ki te gen ka kon sa a pandan yo soulinye PRM nan te patisipe nan 15% nan ka yo anrejistre yo, tandiske Pati Liberasyon Dominikèn nan (PLD) te fè l ak 11% epi pati Revolisyonè a menm te patisipe nan 4,5% ka.
Pou sa a ki gen pou wè ak palmantè ki genyen pouvwa yo, Omar Fernández pou Sendomeng, Antonio Taveras pou Santiago epi Daniel Rivera se moun sa yo ki ta dwe nan tèt Sena dominiken an puiske se yo ki gen plis vòt.
N ap soulinye pou eleksyon 2024 yo an Repiblik Dominikèn, Luis Abinader pase devan Leonel Fernández ak Abel Martínez ak 58,39%, alòske yo menm yo fè youn aprè lòt 27,68% ak 10,79%. Nan premye deklarasyon l yo, prezidan dominiken an felisite pèp li a epi tou pwofite anonse se dènye fwa l ap patisipe nan eleksyon.
Autor de la foto: El País
Atik sa se pwopriyete prive © Gwoup Medya MAGHAITI 2024
