Lapolis touye jodi lendi 6 novanm 2023 a, omwen 8 endividi ak zam ki t al eseye kidnape yon moun nan zòn Dèlma 33. Nan kad operasyon sila, plizyè machann nan mache Sitwon( Yon mache ki ant Dèlma 33 ak Dèlma 31) rive blese, pandan kò chak endividi yo trouve yo nan yon espas ki diferan.
Selon plizyè sous nou ka fè konfyans, endividi sa yo, ki plizyè nan yo te abiye ak inifòm Kò Entèvansyon Mentyen lòd (CIMO), te tante vinn fè yon zak kidnapin espesyalman nan zòn Dèlma 33. Yon aksyon kèk ajan polis reyisi devye puiske gen omwen 8 nan endividi sa yo ki mouri.
Pami sila yo ki mouri yo nou rive konstate gen 2 ladan yo ki te gen rad nòmal sou yo. Youn nan yo jwenn lanmò l nan mache Sitwon, alòske lòt la li menm mouri nan yon kafou ki pote non Kafou 34.
Yon lòt kote, pandan operasyon sila t ap fèt nan Dèlma 33, ak nan dèlma 31 gen omwen 6 machann ki t ap vann nan mache Sitwon ki trouve l nan dèlma 33, ki rive viktim tou, selon sa plizyè lòt machann fè nou konnen.
Pou kounya, viktim yo ap pran swen lopital, tandiske prezime kidnapè yo toujou ap benyen nan san yo. Konsa, malgre operasyon an gen kèk tan depi l fèt moun nan zòn yo fè konnen enkyetid la toujou la.
Atik sa se pwopriyete prive ©️ Gwoup Medya MAGHAITI 2023
