Nan yon operasyon yo tanmen ayè jedi 15 dawout 2024 la, lapolis touye 5 bandi epi arete 13 moun nan yon otèl ki pote non Anvayi. Pami moun ki arete yo, otorite polisyè yo fè konnen gen 2 jounalis ak 3 polisye.
Banatte Daniel, ak Richelson Sénejuste se non 2 jounalis sa yo k ap travay youn aprè lòt nan Radyo Regard FM ak Radyo Pa Nou ki jounen jodi a anba men lapolis. Daprè pòt pawòl lapolis la, Michel Ange Louis Jeune 2 travayè laprès sa yo te twouve yo anndan yon machin leta ak zam nan men yo.
“Nan machin sa lapolis te jwenn an posesyon mesye sa yo yon fizi mak Roder, 2 pistolè mak wòk 19 jenerasyon 4 kalib 9mm, avèk yon chajè ki te gen 15 katouch. Nou jwenn tou 10 250 goud, 4 blòk chekye ki sou non Banatte Daniel ak pyès idantite l, 2 telefòn yon mak Samsung nwa epi yon iPhone”.
Pou sa ki konsène polisye yo, pòt pawòl la deklare polisye Jean Benoît Luckson alyas “Lovakè ya bezwen“, ki se ajan 28yèm pwomosyon gen pòs peyaj pa li bò simityè Kafou a. Li eksplike, ajan an jwenn arestasyon l nan moman li te vin chache lèt transfè pou li te al nan yon lòt pòs afektasyon.
Yon lòt kote, responsab la soulinye pami 5 endividi ki mouri nan echanj kout bal ak lapolis la, genyen tou Cazales Blanco alyas Gwo Fanfan ki se mèt otèl Anvayi a. Endividi sa se te yon evade nan Penitansye Nasyonal e li te fè pati gwoup gang viv ansanm yo.
“Travay li se pote minisyon ak zam nan tout fwaye gang sa yo. Nan moman operasyon sa lapolis arete 13 endividi pami yo 3 polisye. Malerezman nan kad operasyon sa, nou gen yon polisye ki lejèman blese ki pou kounye a ap pran swen ka li nesesite“, daprè detay ki bay yo.
N ap soulinye bò kote responsab yo nan Radyo Regard FM, nan yon nòt yo rann piblik jodi vandredi 16 dawout la yo fè konnen jounalis Banatte Daniel gen plis pase 2 mwa depi l pap travay ak yo ankò. Nan sitiyasyon sa, yo fè konprann yo regrèt sa ki pase a, men yo di yo espere menm jan ak tout moun limyè ap fèt sou dosye sa.
sa se pwopriyete prive ©️ Gwoup Medya MAGHAITI 2024
