Nan yon operasyon yo mennen nan tèt kole ak Otorite Potyè Nasyonal (APN) yo ayè samdi 6 avril la, lapolis anonse yo rive rekipere yon bato transpò nèg ak zam te detounen sou lanmè a. Nan kad operasyon sa, yo fè konnen gen divès bandi ki mouri, epi 2 polisye sòti blese.
Selon eksplikasyon responsab yo nan lapolis la bay, bato sa te sou kontwòl bandi yo depi jedi 4 avril la, e yo presize li te chaje ak diri lè endividi yo te detounen la.
“bato transpò machandiz “Magalie” bandi ame gang Izo ak Jeff yo te detounen, kèk tan aprè l te kite Pò Vare a avèk yon kagezon diri jedi 4 avril 2024 la, nou rejwenn li samdi 6 avril 2024 la, gras ak soutyen lojistik Otorite Potyè Nasyonal yo“, daprè sa yo fè tout moun konnen.
Pou kounya, nan bilan yo bay pou operasyon sila yo te mennen sou lanmè a, Kòdinasyon Près ak Relasyon Piblik(CPRP) nan lapolis la mansyone gen 2 polisye ki sòti blese. Poutan, nan kan endividi ak zam yo, malgre yo pa bay plis detay yo fè kwè ta gen plizyè nan yo ki tonbe nan echanj kout bal ak yo.
N ap soulinye nan dosye 26 zam ajan Polis Nasyonal Ayiti(PNH) yo te sezi nan pò Okap la, yo mete avi rechèch dèyè moun ki ta enplike yo. Wilmane Jean ak Barthol se non 2 sitwayen sa yo responsab yo lonje dwèt sou yo, kòmkwa yo ta youn dèyè lòt komisyonè nan dwàn zam yo te dwe pase nan men l lan epi moun ki te dwe resevwa yo a.
© Tous droits réservés – Groupe Média MAGHAITI 2024
