Aprè manda otorite dominiken yo te mete dèyè l akòz vyòl sou timoun, lapolis nasyonal nan Sendomeng anonse vis konsil Rafy Joel Peralta rann tèt li jodi mèkredi 27 mas 2024 la. Selon El Nacional, aprè zak sa a lapolis te tou arete sispè la.
“Lapolis fè konnen Peralta Holguín ki gen 31 lane rive arete sou lòd manda arestasyon nimewo 601-01-2024-EADM-00123, aprè li te vin pot tèt li vini douvan sou direksyon rejyonal ankèt (Dicrim), lapolis San Francisco Macorís“, daprè enfòmasyon jounal El Nacional bay sou dosye sa a pandan yo fè konnen tou lapolis ap gen pou transfere sispè la nan jiridiksyon ki dwe jere dosye sa a.
Nan bò pa ministè zafè etranjè dominiken an, yo te anonse jodi mèkredi a menm, yo sispann aktivite diplomat la pandan yo menm y ap mennen ankèt sou li. Dezisyon sa pran, se aprè otorite yo dekouvri Vis konsil Rafy Joel Peralta gen gwo akizasyon vyòl sou ti fi, ki gen pi piti pase 16 lane, sou do l nan moman sa.
“Li akize paske l te vyole yon timoun sa gen anviwon yon mwa, nan kominote Mata Larga nan San Francisco de Macorís“, daprè nòt ministè a jounal Listín Diario rapòte.
Vis konsil Rafy Joel Peralta Holguín nan pòs sa li te okipe a depi 22 dawout 2022, aprè prezidan Luis Abinader te nonmen l. Selon Listín Diario se pwokirè epi kòdonatris Inite vyolans sou jan, deli seksyèl ak domestik, Sandra Sierra Difó, ki konfime ankèt yo ap tanmen sou diplomat la, puiske yo fè konprann tout revelasyon sa yo fèt se aprè plent yo te resevwa pou konsil la yon mwa avan sa a.
Autor de la foto: De Ùltimo Minuto
© Tous droits réservés – Groupe Média MAGHAITI 2024
