Lapolis nan tèt kole ak komisè gouvènman Mibalè a, Gabriel Fleury arete ayè vandredi 29 desanm 2023 a, 3 sitwayen epi rive sezi 9 960 bal kalib 5.56 nan men yo. Selon responsab yo, endividi yo te vle pase ak katouch sa yo pami yon bann kès poul ki ta ap sòti Sendomeng men destinasyon yo se te pou rive Pòtoprens.
Jean Lipré Descolines 34 lane, Robenson Descolines 18 lane, ak Belgrade Smith 52 lane ki se chofè machin nan, se 3 sitwayen sa yo otorite yo arete nan kad trafik zam sa nan sant peyi a.
“Nou te gen yon alèt sou machin sa, efektivman nou rive kanpe l nou fè l antre nan komisarya Mibalè a, lè nou finn fè fouy nan machinn nan nou jwenn 5 sak bal. Yo mete yo nan mitan kès poul yo mete anba ak anlè epi sou kote“, daprè deklarasyon komisè gouvènman Mibalè a, Gabriel Fleury ki presize aprè konsta jij lapè yo jwenn se 9 960 bal ki te sere nan machin poul sa.
Selon sa youn nan akize yo deklare, yo pa ta gen anyen pou wè ak kesyon trafik zam sòti Sendomeng pou vinn Ayiti, yo te sèlman ap pote yon komisyon yo te ba yo fè.
Atik sa se pwopriyete prive ©️ Gwoup Medya MAGHAITI 2023
