Lapolis gras ak entèvansyon Biwo Lit Kont Trafik Dwòg (BLTS) ak Direksyon Santral Polis Jidisyè (DCPJ) nan ayewopò a, anonse jodi vandredi 6 oktòb 2023 a, yo rive arete Sidolixe James Smith kòm yon manb aktif gwoup gang Vitelhomme Innocent ap dirije a. Selon enfòmasyon lapolis bay, akize a te sou wout pou vwayaje ale Miami sou yon viza fiyansay li jwenn.
“Sidolixe James Smith jwenn arestasyon l jedi 5 oktòb 2023 a, nan moman li te gen pou al Miami nan konpayi Spirit Airline tousuit li te jwenn yon viza fiyansay nan kòmansman mwa septanm nan“, daprè enfòmasyon lapolis bay.
Otorite polisyè yo prezante Sidolixe James Smith alyas Jimmy kòm yon prezime gang, ki ta fè pati gwoup gang Kraze baryè. Kidnapin, ansasinay, piye kay moun nan Tòsèl, se divès akizasyon sa yo ki peze sou do endividi sa DCPJ t ap chache depi lontan an.
Pou kounya, endividi a nan men DCPJ annatandan lajistis panche sou ka li. Pandantan sa, lapolis nan bò pa li fè konnen yo detèmine epi mete plis siveyans nan ayeyopò a, ak sou fwontyè yo yon fason pou mete men sou tout endividi ki komèt vye zak nan peyi a epi ki pare kò yo pou vwayaje.
Atik sa se pwopriyete prive ©️ Gwoup Medya MAGHAITI 2023
