Nan kad operasyon ki lanse pou mete men sou tout endividi ki enplike nan zak banditis nan peyi a, lapolis anonse jodi lendi 6 novanm 2023 a, yo resi jwenn sitwayen ki te fè konplo pou bandi te rive anvayi zòn Sodo nan mwa septanm pase a. Daprè detay yo bay, yo fè konnen se nan vil Okap yo arete prezime koupab la.
Saint-Victor Raimé se sitwayen sa otorite polisyè yo idantifye kòm moun ki enplike nan atak ame nèg ak zam te fè nan depatman Sant peyi a, espesyalman nan zòn Sodo.
“Selon enfòmasyon lapolis dispoze se misye ki ta konplote avèk plizyè lòt manb gang ki sòti lòt kote pou te vinn simaye latwoublay nan komin nan kote plizyè moun nan popilasyon sivil la te sòti viktim”, se sa responsab yo fè konnen.
Yon lòt kote, yo fè konnen otorite polisyè nan depatman Sant la deja tanmen gwo demach bò kote responsab nan Okap yo, yon fason pou pèmèt akize a, Saint-Victor Raimé kapab vinn reponn kesyon lajistis jan sa dwe ye. Konsa, responsab yo voye yon pinga bay tout moun ki gen men yo tranpe nan move zafè, paske yo soulinye yo menm y ap kontinye fè tout sa k depann bò kote yo pou moun sa yo sibi konsekans tout move zak yo fè yo .
N ap raple komin nan te sibi 2 atak bandi ak zam pandan mwa septanm nan, sa ki te fè gen plis pase yon dizèn moun ki te mouri. Pou atak yo, youn te fèt nan lannuit vandredi 22 septanm nan kote endividi yo te profite boule komisarya a, pandan lòt la li menm te fèt nan lannuit 25 pou rive madi 26 septanm 2023 a, nan atak sa yo te menm rive anvayi lopital inivèsitè leta Mibalè a.
Atik sa se pwopriyete prive ©️ Gwoup Medya MAGHAITI 2023
