Nan operasyon lapolis tanmen nan vil Ench semèn pase yo, yo fè konnen jodi madi 12 septanm 2023 a, yo rive mete men sou 6 endividi pami yo 2 fanm ki selon yo menm ta gen lyen pwòch ak chèf gang Tizo. Selon responsab yo, 6 moun sa yo se ta manb aktif gang k ap opere nan zòn Jerizalèm ak Lilavwa.
Coq Louidina se non youn nan fanm sa yo otorite polisyè yo arete, ki selon enfòmasyon yo bay ta gen relasyon fanm ak gason ak chèf gang Jhonson Blanc alyas “Tizo“, alòske Cassandra Mildor li menm ta idantifye kòm sèvant Louidina, ki rive ansent pou prezime chèf gang Tizo ki li menm ap kontwole zòn Jerizalèm.
Willy Hilaire, Richenightder Hilaire, Junior Lafleur, Blanc Alex se non lòt endividi sa yo ki ta yo menm tou nan konivans ak gwoup gang. Daprè kòdinasyon près lapolis la akize yo te gen entansyon pou ale nan vil Okap.
Pou kounya, 6 akize yo nan men lapolis kote y ap tann pou yo al reponn ak kesyon lajistis.
Atik sa se pwopriyete prive ©️ Gwoup Medya MAGHAITI 2023
