Responsab lame dominikèn yo anonse jodi jedi 18 avril 2024 la, yo arete yon prizonye ki te sove kite prizon Kabarè a. Daprè Listín Diario, prizonye sa jwenn arestasyon l pandan l t ap eseye antre nan lokalite Comendador, an Repiblik Dominikèn.
Clairzier Emase se sou non sa otorite dominiken yo idantifye prizonye sa yo arete a. “Nan yon deklarasyon lame a fè yo soulinye fanm nan yo te arete l pandan l t ap tante antre nan lokalite Comendador”, pi douvan yo di tou Emase se youn nan 142 prizonye ki te sove nan prizon Kabarè a, nan lannuit 2 mas pase a.
Anplis sa, jounal la mansyone yo gentan remèt lapolis ayisyèn madanm nan depi lè yo te fin arete l la. Nan lide pou bay yon eksplikasyon sou arestasyon sa, yo fè kwè Wo responsab nan Polis Nasyonal Ayiti a(PNH) atravè Ministè zafè etranjè dominiken an te ba yo idantite tout prizonye ki te sove nan 2 pi gwo prizon peyi a.
N ap raple, jouskaprezan pyès otorite pa t janm bay chif prizonye ki te sove kite Penitansye Nasyonal la ak prizon sivil Kabarè a nan dat ki te samdi 2 mas 2024 la. Bò kote Repiblik Dominikèn, kòmandan jeneral lame yo a, Carlos Antonio Fernández, deja bay lòd pou avèti yo si ta gen yon ka konsa ankò, se pou sa yo mete anpil sòlda pou fè patwouy nan zòn fwontalye yo.
Editor de la foto: Listín Diario
Atik sa se pwopriyete prive ©️ Gwoup Medya MAGHAITI 2024
