Konsèy Sekirite nan Loni reyini sou sitiyasyon Ayiti ap konnen depi bon bout tan jounen jodi mèkredi 21 desanm 2022 a. Reyinyon sa te fèt apati demann peyi Larisi nan mwa Oktòb, kote li te vote pou yo mete anbago zam sou peyi a, sanksyone chèf gang yo epi sila yo k ap founi yo mwayen ak zam. Poutan, gouvènman Ayisyen an lòtbò kontinye ap mande asistans entènasyonal pou ka gen sekirite.
Selon sekretè Jeneral adjwen nan Nasyonzini, Amina Mohammed : «Se vrèman esansyèl pou Ayiti rejwenn enstabilite enstitisyonèl epi retounen nan lapè li ak devlopman dirab.»
Pou abòde kesyon ensekirite a, reprezantan espesyal nan Loni pou Ayiti, Helen La Lime, « Gen anviwon 280 moun ki mouri nan entèval yon mwa novanm, se chif nou pa te janm anrejistre nan yon sèl mwa.»
Fenomenn kidnapin lan, lakoz plis pase 1200 moun kidnape pou egzije lajan ki 2 fwa lane 2021 an, rapò vyòl ak gang miltipliye nan tout rakwen peyi an.
Selon Antonio Guterres, se pou yo mete yon fòs aksyon rapid ki konpoze plizyè peyi ladan li.
Malgre presyon Kanada ak Etazini, okenn peyi pa vle dirije operasyon militè an Ayiti a, nan lide pou yo ta vin ak fòs miltinasyonal la pou konbat gang ak ensekirite nan peyi a.
Loni pa bliye entèvansyon li an 2004 ak 2007 nan peyi a kote kas ble te pral lakoz plis pase 10 000 moun anviwon pran kolera nan peyi a.
Paralèlman, nan lendi 19 desanm lan, pouvwa anplas la te resevwa diplomat akredite an Ayiti a, premye minis defakto a, Ariel Henry : « Mwen sezi okazyon pou m remèsye sekretè Jeneral nan Nasyonzini a, puiske li te pataje avèk manm sekirite nan Nasyonzini demann nou an. Nou espere nan yon tan byen kout peyi a pral konnen yon fòs miltinasyonal k ap vin ede Polis Nasyonal Dayiti a», Twit li te fè sou paj li.
Anplis, premye minis defakto a, Ariel Henry, kontinye ap chèche yon tèt ansanm nan lide pou yo ka òganize eleksyon nan peyi a an 2023, anplis soutyen fòs etranjè anndan peyi a pou konbat gang ak vyolans k ap ravaje sosyete a.
Photo: UN News
Atik sa se pwopriyete prive ©️ Gwoup Medya MAGHAITI 2022
