Konsèy prezidansyèl Tranzisyon an (KPT) te rankontre ak delegasyon Kenyan an kote yo t ap diskite sou deplwayman twoup miltinasyonal peyi Kenya ap gen pou dirije a, jedi 23 me 2024 la.
Delegasyon sa a gen ladan l anpil wo grade nan Lapolis Kenya nan, yo la pou prepare rantre sòlda Kenyan yo sou teritwa nasyonal la, yo menm gentan vizite baz kote sòlda sa yo ap gen pou abite a epi mete ekipman yo.
Sou lòtbò, prezidan Kenya a, William Ruto, te rankontre ak prezidan Joe Biden pou premye vizit li nan peyi Etazini, li te tou pwofite fè pwomès sa a : «Deplwayman fòs miltinasyonal k ap gen pou dirije sou kontwòl Kenya a ap fini pa kraze gwoup gang ak zam an Ayiti yo k ap simen laperèz nan peyi a.»
Pandan otorite Ayisyen yo ak delegasyon pou rantre fòs miltinasyonal la k ap gen 2500 sòlda ladan l lan ap planifye a, gwoup gang “Viv Ansanm” pwofite kraze divès prizon ak komisarya nan zòn kwadèboukè ak Pòtoprens. Li enpòtan pou n soukinye, yo te pwofite dechouke Fakilte Dwa ak Syans Ekonomik ayè jedi 23 me a tou.
Rankont Konsèy Prezidansyèl Tranzisyon ak 6 manm delegasyon Kenyan yo te rive fèt kanmèm malgre dat pou sòlda kenyan yo rantre an Ayiti an te rekile akoz mank materyèl ak ekipman pou penmèt operasyon yo fèt pi byen.
«Fòs Kenya yo ap vin an Ayiti pou ede peyi sa a ki se frè yo goumen kont gwoup gang», sa a se deklarasyon prezidan William Ruto nan konferans pou laprès li te bay pandan li te rankontre ak Joe Biden nan vil «Washington».
Pou fini, n ap raple Konsèy Prezidansyèl Tranzisyon an te rankontre ak kèk ekspè nan sekirite nasyonal, pwofesyonèl nan dyaspora epi lòt pèsonalite ankò, nan dat mèkredi 22 me 2024 ki sot pase a, nan lide pou yo diskite ak akonpanye gwoup miltinasyonal ki pral gen pou rantre nan batay kont gang ak zam yo.
Atik sa se pwopriyete prive ©️ Gwoup Medya MAGHAITI 2024
