Aprè diskisyon yo te anonse k ap gen pou fèt jodi a avèk kandida yo te kenbe yo, Konsèy Prezidansyèl Tranzisyon an deside chwazi, jodi madi 28 me 2024 la, Garry Conille kòm Premye minis peyi a. Selon Radio Métronome, 6 moun nan majorite a te mete yo dakò pou se ansyen chèf gouvènman an ki reprann pouvwa a.
Garry Conille, ansyen premye minis Ayiti nan lane 2011-2012 sou gouvènman Michel Martelly, se moun sa a ki pral ranplase Michel Patrick Boisvert nan pòs premye minis la. Sou 7 moun ki gen dwa deside sou dosye enpòtan yo, se ta 6 konseye nan Konsèy la ki yo menm pran desizyon sa pami Fritz Belizaire, Paul Antoine Bien-Aimé, Alix Didier Fils-Aimé, Jean Rodolphe Joazil ki te kandida pou pòs sa a.
Mete sou kote karyè politik li, nouvo Premye minis la ki gen 58 lane, li te kowòdonatè rezidan Nasyonzini ak kowòdonatè imanitè nan peyi Nijè nan lane 2011, li te reprezantan adjwen Ayiti nan Fon Nasyonzini pou Popilasyon (UNFPA), li te konseye teknik prensipal pou Afrik. Mete sou sa a, li se doktè nan zafè medsin e li se direktè rejyonal UNICEF pou Amerik latin nan ak Karayib la.
Pandan tan sa a, n ap soulinye jij Al Duniel Dimanche te òdone nan mwa desanm 2023 a pou Garry Conille te vin reponn kesyon sou enplikasyon prezime l nan dosye koripsyon nan Sant Nasyonal Ekipman (CNE) an. Poutan, daprè sa a kabinè avoka l te pibliye nan dat 9 janvye 2024 la, yo te defann tèt yo pou yo di yo pa konn rezon konvokasyon jij la, men tou yo te di yo pa t jwenn okenn papye lajistis nan sans sa a.
Yon lòt kote, ansyen minis kondisyon fanm nan, Marie Denise Claude denonse manm Konsèy la pou divès desizyon yo pran nan sans sa a. Se pou sa a li estime, konpòtman manm Konsèy la anvè li menm “seksis” paske yo te chwazi retire l kòm sèl grenn fanm nan kous pou vin premye minis peyi a.
Atik sa se pwopriyete prive ©️ Gwoup Medya MAGHAITI 2024
