Kèk jou aprè enstalasyon Konsèy Prezidansyèl Tranzisyon an (KTP) nan tèt peyi a, jodi madi 30 avril 2024 la, nan pale ki te gen nan mitan yo, Edgar Leblanc fils se moun yo chwazi kòm prezidan konsèy la.
Se reprezantan pati sivil la, pastè Frinel Joseph ki anonse nouvèl la jodi a menm nan moman eleksyon an te dwe fèt nan Laprimati.
“Jodi madi 30 avril la, nou gen yon prezidan tout moun konnen nan konsèy la, ki pral mennen bak konsèy la selon akò ki te jwenn nan mitan divès pati ki t ap deside yo. Kidonk, mwen prezante nou Edgar Leblanc fils prezidan konsèy tranzisyonèl la”, daprè deklarasyon manm obsèvatè a ki presize se majorite a ki chwazi ansyen palmantè a.
Edgar Leblanc fils, Smith Augustin, Louis Gérald Gilles, Emmanuel Vertilaire, se moun sa yo selon Frinel Joseph ki yo menm te dakò ak chwa ansyen prezidan Sena a pou vin dirije KPT a. Yon lòt kote, pastè a te tou pwofite anonse, Fritz Belizaire kòm moun yo chwazi pou vin premye minis peyi a.
“Nou kwè nan konsèy la, premye bagay ki enpòtan pou nou se mete ansanm ki nan nou an, se volonte e detèminasyon, depase konfli yo pou nou rive nan konsansis, epi kèk fwa apati desizyon epi chwa pou gwo dezisyon enpòtan yo“, se premye pawòl sa yo prezidan konsèy la, Edgar Leblanc fils deklare pandan l fè konnen aprè eleksyon sila lòt etap ki gen rapò ak sekirite nasyon an pral kòmanse.
Atik sa se pwopriyete prive © Gwoup Medya MAGHAITI 2024
