Konsèy prezidansyèl Tranzisyon an anonse sou kont X li, lendi 20 me 2024 la, yo gen yon pwojè netwayaj ak pwòpte nan zòn kapital la ansanm ak lòt zòn ki antoure l yo. Pwojè sa a pral koute 1 milya goud.
Achitèk Leslie Voltaire, manm konsèy la te pale pou l fè konnen te gen yon rankont ki te fèt ak yon delegasyon majistra nan zòn Pòtoprens, ansanm ak direktè jeneral Sèvis Nasyonal Jesyon Rezidi Solid la (SNGRS).
Kanpay asenisman sa a pral chita epi bay enpòtans ak wout ki nan move eta yo, sa a ki pral pèmèt yo rive idantifye pwoblèm yo pandan y ap sible ki travay efikas yo pral fè.
Anplis, pwojè sa a pral gen omwen 5 konsekans pozitif pou popilasyon an tankou : Pwoteksyon sante abitan nan kapital kont pwopagasyon mikwòb ak moustik k ap pote maladi akòz pil fatra sou wout yo; rediksyon risk ak prevansyon dezas kont sezon siklòn k ap vini an nan mwens pase yon mwa a; ankouraje netwayaj ak pwòpte lari Pòtoprens yo; kreye 2500 travay dirèk ak anviwon 10000 travay endirèk nan lide pou kreye yon klima politik favorab pou pran an chaj administrasyon piblik la ansanm ak nouvo gouvènman an kote chwa premye minis la ap fèt kounye a.
Pou fini n ap raple prezidan Konsèy Prezidansyèl Tranzisyon an te fè konnen, 18 me ki sot pase a, pa gen okenn tèritwa ki pèdi. Sa a ki ta eksplike leta pare pou l repran espas kote bandi ap simen latwoublay pandan lontan yo.
Atik sa se pwopriyete prive ©️ Gwoup Medya MAGHAITI 2024
