Aprè 4 mwa pwotestasyon kont prezidan Luis Abinader pou divès desizyon l te pran kont Ayiti, ayè vandredi 15 desanm 2023 a, plizyè komèsan ayisyen rekòmanse ak aktivite komèsyal yo nan mache fwontalye Dajabón nan. Komès la kòmanse refèt nan 2 peyi yo se tousuit aprè yon gwoup endividi te kraze pòtay fwontyè Wanament la jedi pase a pou te antre Ayiti avèk komès.
Pou sa te rive fèt, jounal dominiken yo di konsa tout ayisyen ki te travèse fwontyè Sendomeng la te dakò mete yo youn dèyè lòt pou te fè anrejistreman byometrik gouvènman yo enpoze a. Poutan avan sa, se te yon mezi otorite lokal yo nan Wanament te toujou montre yo kont li, e yo te menm deklare toutotan Abinader pa retire tout mezi sa yo pa t ap gen komès ant 2 peyi yo.
“Depi nan granm maten, plizyè santèn Ayisyen te antre sou teritwa dominiken an nan objektif pou vinn nan mache binasyonal la. Ajan Cesfront yo t ap kontwole yo yon fason pou mete lòd nan zòn nan, pandan yo menm yo te youn dèyè lòt pou antre non pòt dominiken an“, Daprè N Digital ki fè konnen komèsan Sendomeng yo pa t sispann eksprime lakontantman yo pou mache sa ki resi louvri a.
“Li te lè l te tan pou n te tabli komès la ankò. M espere otorite yo ap dakò, paske ayisyen ki antre nan mache sa pa vinn pou yo abite men yo sèlman vle achete ti machandiz yo“, se sa yon komèsan dominiken deklare jounal la.
Paralèlman, nan sa ki konsène ak pòtay la endividi yo te kraze epi voye jete nan rivyè masak la, prezidan Luis Abinader nan bò pa li, fè konnen tout sa ki enpòtan pou li se pwoteje fwontyè yo a. Aprèsa tout rès bagay la rete nan men gouvènman ayisyen an puiske l estime se pou yo pòt la ye.
N ap raple, se popilasyon Wanament la ki te deside fè gwo manifestasyon sa ki te mennen ak fèmen fwontyè a bò kote pa nou 8 oktòb pase a. Desizyon sa te pran se nan kad pou te bay gouvènman Abinader la yon repons paske l te fèmen fwontyè pa l la depi 15 septanm 2023, akòz kontriksyon kanal Wanament la.
Credit Photo: Courrier International
Atik sa se pwopriyete prive ©️ Gwoup Medya MAGHAITI 2023
