Òganizasyon Kolektif Inivèsitè pou Ranfòsman Edikasyon Kominotè ak Kilti (KIREKK) k ap milite pou retire vyolans nan kominote yo, rive mete kanpe kèk aktivite akademik ki kapab evite jèn yo fè plis deriv nan zòn Kafoufèy. Responsab yo chwazi òganize fòmasyon sa anba tèm «Yon omaj pou eritaj kiltirèl Kafoufèy, yon apèl pou pwoteksyon fanm ak tifi».
«KIREKK se yon aktivite nou deside mete kanpe pou n gade kijan n ka patisipe nan pote kole ak jèn k ap viv yo nan tout katye popilè yo», deklare responsab KIREKK la, Renald Conseillant ki presize aktivite a kòmanse fèt depi sòti 18 me pou rive 16 jen k ap vini la.
konferans, deba, atelye lekti, analiz, atelye sikosyosyal, atelye sansibilizasyon, atelye fòmasyon, pratik, pwojeksyon fim, atelye penti ak grafiti se divès eleman jèn fanm ak jèn gason ap benefisye nan kad pwogramasyon aktivite sila.
«Nou vle mete kèk aktivite para akademik kanpe ki kapab evite jèn yo franchi wout delenkans nan katye popilè yo, sitou pandan peryòd vakans la», ajoute Renald Conseillant.
Pou sa ki gen pou wè ak pèsonalite piblik k ap la yo, nou jwenn Gary Victor, Francisco Silva, Sophonie Saint-Halire, Wilbert Fortuné epi Émile Paul alyas Zikiki. Pandantan sa, òganis la fè konprann yo pa sèlman ap ofri jèn yo fòmasyon an, men li pèmèt yo devlope estim ak konfyans lakay yo sitou avèk eslogan yo ki se :«Gen pi bèl jou k ap vini».
Prezidan an avanse pou l di : «Ensekirite a frape yo, sitou depi aprè gwoup gang Gran Ravin te pran plizyè lokalite nan Kafoufèy, KIREKK pèdi anpil kolaboratè ak patisipan ki te konn la avèk yo. Paske, zòn nan vin manke frekante avèk moun».
«Nou plis swete se kominote a ki voye je sou kominote a, pandan n pa inyore se leta ki dwe n pwoteksyon ak bon jan lavi miyò», soulinye prezidan estrikti sa ki kreye nan dat 16 Oktòb 2018 nan ri Sen Jera. Renald Conseillant raple objektif enstitisyon sa a se kontinye òganize aktivite para akademik ak Kilti nan plizyè lokalite, nan lide pou pote kole epi mete men pa li nan redresman sosyete Ayisyèn nan. Puiske, pa gen leta nan katye popilè yo.
Pou fini, KIREKK mande avèk jèn yo pou enplike yo nan chanjman kominote yo, epi ankouraje moun yo pou pwoteje fanm ak tifi nan sosyete a. Sa ki selon yo menm ka pèmèt nou kwape zak vyolans domestik, vyolans fizik, vyolans sikolojik yo ap sibi depi lontan.
Atik sa se pwopriyete prive ©️ Gwoup Medya MAGHAITI 2024
