Jounal Miami Herald fè konnen jodi jedi 24 dawout la responsab peyi Kenya yo pa gen okenn entansyon pou vinn ede lapolis goumen kont gang nan peyi Dayiti vre. Nan sans sa, jounal la fè konnen yo te pito pwopoze gouvènman ayisyen an pou yo ta vinn sekirize kèk gwo enfrastrikti nan peyi a olye pou ta vinn ede nou konbat nèg ak zam sou teritwa a.
“Pwopozisyon an pran fòm yon òf ki vize pou ta vinn pwoteje enfrastrikti gouvènmantal enpòtan yo tankou, ayewopò a, pò maritim yo, ak wout prensipal yo“, se sa jounal ameriken an fè konnen ki sòti nan dokiman sa ki pote non “fòs pwoteksyon estatik” delegasyon Kenya a te prezante gouvènman Ariel Henry a ak tout wo kòmandman lapolis la pandan reyinyon travay yo te gen ansanm nan jou pase yo.
Yon lòt bò, yo fè konnen tou pandan evalyasyon yo t ap fèt nan lakou Pòtoprens la, responsab Kenya yo pa t rive mete yo dakò pou yo ta kontinye e menm rive poze aksyon ak demann entèvansyon rapid premye minis Ariel Henry ak sekretè Jeneral Nazyonzini an Antonio Gutteres te fè yo.
Nan ka yo ta rive aksepte pou vin akonpli misyon sa an Ayiti men kèk kondisyon responsab peyi afriken an bay, toujou selon Miami Herald. “Jan rezolisyon konsèy sekirite Loni an di l la se pou Etazini fè l jan l te di a: l ap bay kenyan yo zouti y ap bezwen pou tabli baz yo sou sòl ayisyen an. Yon lòt kote, fòk ta gen pou pi piti 2 000 sòlda ki prè pou antre nan batay la, men peyi Kenya ap voye sèlman 1 000 sòlda”.
Pandantan sa, wo kòmandman lapolis la fè kwè nan yon nòt yo fè sòti ayè mèkredi a, aprè delegasyon peyi Kenya a te finn kite sòl ayisyen an, chita pale ki te gen ant yo ak delegasyon an te itil anpil. Diskisyon yo te pèmèt yo te rive presize ki sa yo vle, ak kisa yo bezwen nan men peyi Kenya konsènan èd yo ta dwe vin bay polis nasyonal la.
“Rankont sa te pèmèt tout moun rive konprann misyon an ki p ap la pou ranplase polis nasyonal la ni pou vin fè travay la nan plas yo, men misyon an ap vini nan kad pou ede polis la vin pi pèfòman, plis ka jwe wòl li yon fason pou reponn ak misyon yo ki se pwoteje ak sèvi” selon sa wo kòmandman an te di nan nòt sila.
Crédit photo: Africanews
Atik sa se pwopriyete prive ©️ Gwoup Medya MAGHAITI 2023
