Anviwon 25 jou depi anplwaye EDH yo nan zòn Pelig te tanmen yon grèv kont pi wo nivo nan Leta a pou lajan yo dwe yo, revandikasyon yo rive respekte sa ki fè grèv la leve. Tousuit aprè anons sila, se te gwo kri lakontantman nan kèk zòn nan kapital la ki kòmanse jwenn kouran, malgre li pa fè anpil tan.
Selon sa Pierre Michel Félix ki se youn nan reprezantan anplwaye EDH yo nan Pelig
deklare sou Panèl Magik9 jodi samdi a, li fè konnen otorite yo resi bay yo 2 mwa salè sou 5 mwa yo dwe yo a aprè plizyè chita pale ki te genyen. Alòs nan sans sa, li fè konnen depi ayè vandredi a grèv la leve sa ki ta vle di pwoblèm kouran an rezoud nan zòn ki pa t genyen yo.
Yon lòt bò, Félix fè konnen EDH te gen pwoblèm pwodiksyon se sa k fè menm avan grèv la gen kèk kote ki pa t ka gen kouran souvan. Li di tou, pou kounya popilasyon an pral ka rale yon souf paske yo menm nan Pelig yo kòmanse travay depi ayè vandredi a.
Bò kote pa sitwayen yo, wè kouran an sèlman se yon soulajman paske daprè sa yo di, sa prouve y ap ka jwenn li pi souvan kounya. Nan sans sa, yo fè kwè yo pap gen pou ap depanse pil lajan nan chaje telefòn chak jou, oubyen achte glas pou desann chalè a nan moman sa.
“Dat m pa wè kouran ak je, si tout bon Leta peye anplwaye yo omwen nou gen lespwa n ap jwenn ti moso kouran an, sitou ak chalè sa k ap pete fyèl moun nan“, daprè deklarasyon kèk sitwayen ki te sezi wè anpoul yo limen nan zòn Dèlma jodi samdi 13 me 2023 a.
Atik sa se pwopriyete prive ©️ Gwoup Medya MAGHAITI 2023
