Aprè Repiblik Dominikèn te fin itilize yon esistèm ponpaj pou pran dlo nan kanal “La Vigia“, yon gwoup sitwayen ayisyen itilize menm estrateji a pa bò kote pa yo pou yo pran plis dlo tou nan rivyè Masak la ayè jedi 11 Avril 2024 la. Ayisyen yo fouye yon twou epi anpile yon pil tè nan zòn lan pou kanal pa yo a ka jwenn plis dlo tankou Repiblik Dominikèn fè li, selon jounal Listin Diario.
Li enpòtan pou n konnen, sòlda dominiken ki sou fwontyè a pa ka anpeche ayisyen yo fè sa a paske se sou tèritwa pa yo, yo fè sa a. Pandan tan sa a, gen yon sous ki sòti nan Enstiti Nasyonal Resous Idwolik (INDRHI) ki fè Listin Diario konnen, y ap gen pou enstale kèk ponp elektrik nan yon pwochen tan sa k ap penmèt agrikiltè yo jwenn plis dlo pou yo ka fè jaden yo.
Gouvènman dominiken an parapò ak Enstiti Nasyonal Resous Idwolik (INDRHI) pral gen pou li mete 2 ponp elektrik ki pral fasilite yo pran 50% dlo anplis nan rivyè Masak la, pou ale nan kanal «La Vigia». Anplis, enstans dlo sa a pral gen pou fouye yon pi parapò ak demann agrikiltè yo pou yo ka jwenn plis dlo pou awoze jaden yo.
N ap raple n an desanm, ayisyen k ap travay sou kanal la fini ak kanal pa yo a nan zòn Maribawou, kote yo te reyalize li atravè tèt kole ak tèt ansanm (nan lespri konbit).
Nou dwe konnen, Kanal sa a, ayisyen yo konstwi nan tèt ansanm nan, pral bay penmèt 3000 ekta tè jwenn dlo sa a ki pral fè tè a bay anpil manje nan Wanament ak tout rès depatman Nòdès la.
Konstriksyon kanal la se yon inisyativ ki montre yon lòt fwa solidarite ayisyen yo. Sipò BSAP nan pwoteje travayè yo kont tout entimidasyon sòlda dominiken yo montre tou jan n ka solidè youn ak lòt.
editor de la foto :Listin Diario
Atik sa se pwopriyete prive ©️ Gwoup Medya MAGHAITI 2024
