Nan yon atik jounal Washington Times sòti jodi lendi 12 jen an, yo fè konnen nan mwa avril ki sot pase la, gen 10 437 ayisyen ki gentan vwayaje al Etazini nan pwogram imanitè Biden nan. Chif yo bay yo fè konprann, nan 275 448 migran ki pile teritwa ameriken an pou mwa avril la, chif migran ayisyen yo plis pase lòt peyi benefisyè yo.
“Pami moun ki rive nan ayewopò a nan mwa avril 2023 a, gen 10 437 moun ki te sòti Ayiti, 7 316 sòti Kiba, 5 435 sòti Venezyela, 5 215 Nikaragwa. Gen 5 435 lòt ki yo menm te sòti nan peyi Ikrèn”, selon chif jounal ameriken an rapòte. Sa ki bay tou, yon total 275 448 migran Ayisyen, Kiben, Venezwelyen, ak Nikaragweyen ki nan peyi Etazini nan moman an.
Pandantan sa, Washington Times di depi lè gouvènman ameriken an pran desizyon pou mete pwogram imanitè a sou pye, gen antou 95 000 migran yo anrejistre ki sou teritwa yo a.
N ap raple jijman 20 Eta Repibliken yo, ki vle kanpe pwogram nan fas ak administrasyon Biden nan, pap fèt nan mwa jen sa ankò. 2 pati yo te antann yo pou chanje dat jijman an pou 24 dawout 2023, se yon dezisyon ki pran nan tèt kole ak jij Drew Tipton ki li menm sou dosye a.
Credit Photo: Nextgov
Atik sa se pwopriyete prive ©️ Gwoup Medya MAGHAITI 2023
