Depi nan 10 zè nan maten, dimanch 4 dawout la, kout zam pa sispann tire nan plizyè zòn nan Plèn nan.
Nou pa konnen si kout bal sa yo antre nan kad yon operasyon Polis Nasyonal la tanmen, men depi plizyè jou bandi ak zam ap toke kòn yo ak ajan polis yo nan plizyè lokalite nan Plèn nan tankou Kazo, Bigarad ak Kwadèmisyon.
Kout zam sa yo kòmanse depi jou ki te dimanch 28 jiyè 2024 la. N ap sonje nan premye bilan Polis Nasyonal la te prezante ak laprès, nan mitan semèn ki sot pase a sou seri operasyon yo mennen pandan peryòd eta ijan sekiritè a, kòmandan an chèf la, Normil Rameau te fè konnen genyen 27 bandi nan Kwadèmisyon ki tonbe anba bal Lapolis menm jou dimanch sa.
Yon lòt bò, sitiyasyon sa enkyete abitan Kazo ak Sat yo. Kèk nan yo pataje ak nou gwo dout yo genyen sou antre lekòl la nan Plèn nan paske nan dat 10 fevriye a bandi ak zam te mete anpil nan yo deyò, sa ki te gen gwo konsekans sou ane lekòl la. Pandantan sa, genyen nan lekòl yo ki gentan mande paran yo peye premye vèsman ane lekol k ap vini an.
N ap raple se depi aprè atak gang Chen mechan sou komisarya Kazo a ak seri zak vòlè ki te fèt nan plizyè bank kòmèsyal nan komin Site Solèy ak Kwadèboukè nan mwa mas pase a, moun pa frekante zòn sa yo menm jan an.
Aprè atak sa yo sitou kote gang yo te fè tantativ pou pran kontwòl baz BIM nan plizyè fwa, polisye yo nan Taba montre yo detèmine pou mache sou gang sa yo k ap simen lapèrèz nan popilasyon an.
sa se pwopriyete prive ©️ Gwoup Medya MAGHAITI 2024
