Nan lide pou pwoteje sitwayen yo genyen an Ayiti yo, prezidan meksiken an, Andrés Manuel López anonse jodi lendi premye avril 2024 la, yo retire 34 moun yo nan peyi a. Selon Listín Diario, operasyon sa kòmanse depi ayè dimanch la kote resòtisan yo ap rive Meksik jodi lendi a.
“Li te posib pou n pote sekou epi retire 34 resòtisan ki te an danje akòz konfli yo lwen Ayiti”, daprè deklarasyon chèf gouvènman meksiken an.
Pami 34 moun yo, minis zafè etranjè yo a Alicia Bárcena, di gen 24 gason ak 10 fanm, 4 nan yo se fonksyonè nan anbasad Meksik ki Ayiti a, anplis te gen 7 timoun ladan l tou. Daprè lòt detay ki bay yo, moun sa yo rive kite peyi a gras ak bato sekretè marine yo a ki te pwoche nan dlo ayisyen an pou operasyon espesyal sila.
Nan menm sans sa, gwo responsab la fè konnen rezon ki fè yo retire sitwayen meksiken yo se paske yo rete kwè pa gen anyen ki garanti sitiyasyon sekiritè Ayiti ap chanje.
Pou kounya, anplis Meksik gen divès lòt peyi ki gentan retire sitwayen pa yo an Ayiti. Pami yo nou jwenn, Etazini, Lachin, Lafrans, Kanada, Kiba. Annatandan selon Miami Herald, konpayi ayeryen yo tankou Jet Bleu, American Airlines, Spirit Airlines kanpe tout vòl yo gen sou Ayiti pou premye jou semèn mwa avril la.
Atik sa se pwopriyete prive ©️ Gwoup Medya MAGHAITI 2024
