Jan prezidan dominiken an Luis Abinader te anonse l pandan semèn nan, jodi mèkredi 6 dawout 2023 a, li pase lòd pou fèmen fwontyè Dajabón nan. Selon jounal Listín Diario desizyon sa pran akòz kèk ayisyen te deside konstui yon kanal pou jwenn dlo nan rivyè masak la.
“Si nou dwe fèmen fwontyè a n ap fè l menm jan nou konn fè sa nan plizyè lòt okasyon. Sa konsène sekirite nasyonal peyi a“, se deklarasyon sa prezidan dominiken an te fè lendi pase a, aprè l te finn anonse yo ta pral mande pou gouvènman ayisyen an kanpe travay sitwayen yo ap fè nan rivyè masak la.
Konsa, aprè okenn aksyon pa tanmen bò kote gouvènman ayisyen an pou kanpe travay yo, gouvènman dominiken an li menm deside fèmen tout pòt ki sou fwontyè a, ak tout pòt ki bay sou mache binasyonal la. Nan sans sa, plizyè kamyon machandiz, ak yon bis konpayi “Caribe Tour” bloke sou wout la depi maten mèkredi a, kote gen yon latriye militè dominiken k ap veye.
Selon sa responsab dominiken yo deklare, rezon ki fè yo pa dakò a se dèske konstriksyon kanal ayisyen yo ap fè a se nan objektif pou fè dlo pa al jwenn yo nan lòt bò fwontyè a. Konsa tou, yo fè konnen aksyon sila a rive vyole plizyè akò tankou trete pou lapè ak lamitye pou tout tan ak abitraj 1929 la, akò fwontalye 1929 la, epi pwotokòl revizyon fwontyè yo nan lane 1936 la.
Lòt rezon jounal dominiken an soulinye ankò, se ta enplikasyon 3 migran ayisyen nan lanmò yon fanmi ki te gen 4 moun ladan l nan zòn Dajabón lendi 4 septanm pase a. Pou kounya, daprè enfòmasyon yo, gen youn nan akize yo ki mouri nan echanj kout bal ak militè dominiken, alòske gen yon lòt ki sou kontwòl lapolis.
Pou sa ki gen pou wè ak twazyèm sispèk la Luis Abinader te fè konnen yo lokalize l kidonk y ap rive arete l nan yon ti tan tou kout. Pandantan sa akòz ansasinay fanmi sa, dominiken nan zòn zak la te fèt la, Partido(Dajabón), menase pou mete deyò tout migran ayisyen ki ap viv nan zòn Aminilla ak tout zòn sou kote yo.
Atik sa se pwopriyete prive ©️ Gwoup Medya MAGHAITI 2023
