Aprè rankont ant anbasadè Hankins ak Minis afè etranje a Jean Victor Geneus ansanm ak premye minis defakto Michel Patrick Boisvert, jounen jodi madi 2 Avril la, gouvènman an fè konnen yo pare pou avanse avèk Konsèy Prezidansyèl Tranzisyon an si yo finalize dokiman yo epi resevwa yo nan vèsyon final yo, selon yon piblikasyon anbasad Amerikèn fè.
«Anbasadè Hankins espere prezante lèt kreyans li bay nouvo gouvènman an ki pral gen pou enstale nan tèt peyi d Ayiti» se sa n ka li sou kont twitter anbasad la.
Sou lòtbò sekretè d eta ameriken an, Antony Blinken te pale ak prezidan Giyàn nan, doktè Irfaan Ali, konsènan sipò pou bay Ayiti atravè konsèy prezidansyèl Tranzisyon an ak entèvansyon fòs miltinasyonal pou sipò sekirite Nasyonal la. Anplis, Etazini apresye patenarya li avèk Kominote Karayib pou komès la (Caricom).
N ap raple nan dat 26 mas ki sot pase la a, peyi Etazini te pwomèt l ap gen pou li debloke anviwon 9 milyon dola ameriken pou sipòte Lapolis Nasyonal d Ayiti epi 2.7 milyon ankò pou entèvansyon imanitè pandan 6 dènyè mwa yo.
Atik sa se pwopriyete prive ©️ Gwoup Medya MAGHAITI 2024
