Depi plis pase yon mwa bandi ak zam te atake ayewopò entènasyonal Tousen Louvèti a, ayè lendi 8 avril 2024 la otorite nan leta yo te deside kraze divès kay ki touprè espas vwayaj sa a nan lide pou pwoteje l kont atak bandi ankò, selon Radio Sans Fin.
Yon traktè te debake ayè byen bonè pou li te kraze plizyè kay moun yo ki te abite touprè ayewopò entènasyonal Tousen Louvèti an sou lòd Lameri taba ak Lapolis, pandan tan sa a yo poko dedomaje pwopriyetè kay yo.
«Nan aprè midi yo te rele m, yo annik di m yo kraze kay la, pandan m te gen 3 pyès kay avèk seramik ladan l. M te al enskri nan meri a, puiske m potko enskri e yo te menm di m pa t konsène akoz se 6 mèt y ap kraze. M te vrèman etone m aprann yo kraze kay mwen.», sa se deklarasyon yon viktim.
N ap raple n te gen yon avyon ki te resevwa yon bal nan atak gwoup gang “Viv Ansanm” te fè sou Ayewopò sa a nan dat 29 fevriye 2024 la, sa a ki te pral lakoz yo te kanpe tout vòl k ap fèt yo depi nan dat 5 mas ki sot pase a.
Pou kounye a, yon latriye ayisyen ki vle pati kite peyi a ap gen pou pran vòl nan Ayewopò entènasyonal Okap la pandan kèk resòtisan etranje yo menm itilize elikoptè ak avyon espesyal kòm mwayen pou kite peyi a.
Atik sa se pwopriyete prive ©️ Gwoup Medya MAGHAITI 2023
