Aprè plizyè èdtan san pipe mo sou divès zak vyolans ki fèt sou 2 prizon nan peyi a ayè samdi a, gouvènman an resi pale nan aprèmidi dimanch 3 mas 2024 la, pou fè konnen yo pral arete tout kriminèl ki dèyè zak sa yo. Konsa, nan yon nòt yo sòti jodi a menm, yo voye gwo kout chapo pou polisye yo e konseye popilasyon an pridans pandan yo anonse yo menm ak lapolis pral aji an konsekans.
“Li mande popilasyon an pou li rete veyatif epi pran anpil prekosyon pandan Polis nasyonal la ap pran tout mezi pou li jwenn prizonye ki sove yo, epi arete responsab zak kriminèl sa yo ansanm ak tout konplis yo, pou lòd piblik ka retabli”, selon sa yo anonse nan nòt sila.
Se konsa, yo pwofite mete aksan, san site non, sou kèk moun selon yo menm ki ta mare sosis yo ak bandi ak zam pou te rive touye moun, piye epi boule byen moun ak byen leta nan moman sa yo. Poutan atravè menm nòt sa tou, gouvènman an rekonèt fòs polis la pa t ka fè fas kare ak nèg ak zam yo nan atak sa yo puiske yo soulinye pou di “malerezman, polisye yo pa t rive anpeche bandi yo lage anpil prizonye”.
San bay okenn chif, yo konfime atak kont 2 prizon yo ayè nan lannuit samdi 2 mas 2024 la, fè anpil blese nan kan prizonye yo ak nan kan anplwaye prizon yo. Poutan, jouskounya poko gen chif disponib pou prizon sivil Kwadèboukè a, men selon chif ofisyèl yon ajan Direksyon Administrasyon Penitansyè yo, se ta plis pase 3900 prizonye ki te chape poul yo ayè nan Penitansye Nasyonal la, alòske se 99 prizonye ki rete nan pi gwo prizon an.
Atik sa se pwopriyete prive ©️ Gwoup Medya MAGHAITI 2024
