Aprè yo te fin fè anons nan jou ki pase yo, gouvènman Ameriken an pran desizyon jodi madi 21 novanm 2023 a, pou li koupe viza tout moun k ap fasilite migran ale Nikaragwa pou ateri peyi Etazini. Selon depatman Leta Ameriken an, desizyon sa konsène espesyalman tout pwopriyetè, dirijan epi gwo fonksyonè antrepriz ki konn òganize vòl sa yo.
«Nan kad gwo lit n ap mennen kont migrasyon iregilye, gouvènman Ameriken an enpoze kèk mezi selon l’INA212 (a)(3)(C)pou koupe viza tout pwopriyetè, dirijan epi gwo fonksyonè antrepriz k ap pwopoze vòl pou ale Nikaragwa. N ap travay tou, nan tèt kole ak gouvènman ki nan rejyon an, anplis sektè prive a yon fason pou n chache elimine pratik eksplwatasyon sa», daprè sa kominike depatman Ameriken an fè konnen.
Yon lòt kote pou kore desizyon sa, responsab yo fè konnen oganizatè vòl sa yo se yon bann moun ki lakoz aksyon yo, paske yo pran yon dividal imigran pou mete yo an danje nan mòd pratik sa. Pi devan, yo estime se yon kòve li ye tou pou migran ki aksepte fè tip vwayaj sa yo puiske yo pa gen okenn baz legal li te ka penmèt yo antre epi menm rete nan peyi Etazini.
Konsa yo konseye tout migran, Ayisyen ak Kiben epi tout lòt sa yo ki ta vle fè wout sa yo pou repanse bagay yo. Paske, yo raple administrasyon Ameriken an mete disponib divès vwa legal pou migran sa yo ki vle antre sou teritwa ameriken an sou baz legal.
Atik sa se pwopriyete prive ©️ Gwoup Medya MAGHAITI 2023
