Nan yon rapò yo sòti madi 7 me 2024 la, Fondasyon Je Klere (FJKL) fè konnen òdonans jij Edwige Dorsainvil la gen dosye enpòtan li pa manyen ladan l. Selon sa yo estime, majistra a te dwe chache plis detay sou kèk reyinyon ki te planifye jou asasinay jounalis Néhémie Joseph la epi jwenn non moun nan sektè ekonomik la ki t ap fè move plan kont li yo.
«Òdonans jij Edwige Dorsainvil la gen limit. Limit sa yo gen rapò ak sa ki pa di yo», daprè sa a ki ekri nan rapò sa a. Nan yon premye tan, yo soulinye jou asasinay jounalis la te gen yon reyinyon ki te fèt lakay direktè Ofis Nasyonal Asirans Vyeyès (ONA), Frédérique Océan, divès moun te la, pami yo Chandou Clerjeune ki idantifye kòm prezime otè zak la daprè òdonans jij la.
Yon lòt kote, yo di tou majistra Dorsainvil pa t tande okenn nan kolèg Néhémie te gen reyinyon ak yo 10 oktòb 2019 la. Se yon fason selon yo menm ki t ap fè plis limyè nan dosye a pou konnen pou ki sa a reyinyon sa a ta gen yon rapò ak lanmò sitwayen an.
Nan kad dosye sa a, yo mansyone rapò jij la ki pibliye nan lannuit vandredi 2 me pase a montre gen moun ki konn fè kontrebann ki te rayi jounalis la, poutan nan òdonans la pa gen okenn non ki bay. Dènye remak yo fè se pa rapò ak Lenel A.C (jan yo konnen l), youn nan moun ki dwe jije douvan tribinal kriminèl yo.
FJKL repwoche nonm lalwa a paske yo estime non moun sa pa bay pyès siy pou ta idantifye l kidonk yo deklare «okenn moun (ainsi connu) paka gen obligasyon pou parèt douvan tribinal kriminèl».
Pou fini, responsab FJKL yo pwofite salye chimen dosye a kòmanse fè a, pandan yo menm yo di y ap tann pou pwosè fèt nan lide pou nasyon an konnen tout verite yo. Se nan kon sa a, yo mande pou gouvènman ki la a retire prese prese majistra Mibalè a, Lochard Laguerre, nan tèt meri a puiske jij Edwige Dorsainvil jwenn li ta gen men l tranpe nan lanmò jounalis Néhémie Joseph la tou.
N ap raple Juste Chandou Clerjeune, Rony Célestin, Elionel Casséus, Angelina Fabiola Cameau, Lochard Laguerre, Douyon Rosevald, Lenel A.C, ak Huguens Charles se non moun sa yo majistra Dorsainvil voye al jije devan tribinal kriminèl an prezans jiri.
Atik sa se pwopriyete prive © Gwoup Medya MAGHAITI 2024
