Fondasyon je klere ki se yon òganis k ap defann dwa moun anndan peyi a montre jan li fache pou fason 3 ajan ki sòti anndan Polis nasyonal dAyiti a (PNH) pèdi lavi yo ayè dimanch lan, akoz yo pran nan yon pyèj nèg ak zam k ap opere nan ba Dèlma. Poutèt sa, FJK di li egzije prese prese arestasyon tout moun ki ta patisipe nan komèt zak sila.
Fondasyon je klere ki anba direksyon Marie Yolène Gilles pa sèlman mande arete koupab aksyon an, men tou li mande pou Frantz Elbé revoke nan tèt lapolis la akoz li pa gen kapasite pou l pwoteje enstitisyon l ap dirije a ak garanti sekirite piblik.
Pandan FJKL pwofite pou l pote soutyen l ak pwòch viktim yo, li tou raple san polisye sa yo ki t ap sèvi leta a dwe koule pou fè n sonje gen yon ijans pou retabli lòd piblik ak trankilite nan lari yo sou tout teritwa nasyonal la.
«Li lè pou nou mete fen nan maskarad zòn san lalwa yo, teritwa pèdi yo ak bandi k ap defye lòd repibliken devan je tout moun», se sa fondasyon an ekri nan nòt la, sepandan li di l renouvle pwopozisyon li genyen pou rekrite an kantite ak fòme jèn sòlda yo pou ranfòse Fòs lame dAyiti a , ranfòse PNH la ak sèvis entèlijans yo pou rive fè fas ak atak gang yo yon fason ki efikas.
Atik sa se pwopriyete prive ©️ Gwoup Medya MAGHAITI 2024
