Nan okazyon fèt imakile konsepsyon an ayè jedi 8 desanm 2022 a, fidèl legliz katolik yo te pwofite mache nan lari pòtoprens pou yo mande vyèj Mari pote yo sekou ak kriz plizyè fasèt Ayiti ap fè fas yo. Pou rete nan lojik eslogan yo, fidèl yo t ap mande lapè aprè yo te fin asiste pwosesyon nan legliz imakile konsepsyon an anba lavil.
Menm jan sa toujou ye chak 8 desanm, ayè jedi a fidèl katolik yo pa te rate okazyon pou yo te selebre fèt imakile konsepsyon an, kote yo te tou pwofite pote kòz peyi a devan vyèj mari, menm jan anpil nan yo kwè l «Pitit manman mari pa janm pèdi batay», daprè sa ki te ekri nan bandwòl yo ak mayo ki te sou fidèl yo.
Pandan tan sa, fidèl yo eksprime kontantman yo paske fèt la rive reyalize ane sa a kanmenm, pou anpil nan yo se yon benediksyon ki tonbe sou peyi a chak fwa yo rive fete nan jou sila a.
Pandan tout pakou yo ki t al bout sou chanmas, yo t ap chante ak drapo nan men epi bandwòl nan men yo, kote yo t ap mande lapè, liberasyon pou peyi a, pou bandi bay peyi a souf ak zak kidnapin pasi pala yo. «N ap mande lapè, n ap mande gras», se kri kèk nan yo ki pa te kache mande pou manman mari ede yo pou retire premye minis Ariel Henry nan tèt peyi a.
Atik sa se pwopriyete prive ©️ Gwoup Medya MAGHAITI 2022
