Nan kad enstriksyon jij Walter Wesser Voltaire t ap fè nan kad dosye ansasinay ansyen prezidan Jovenel Moïse la, Félix Badio ki se youn nan akize yo tou bay plizyè moun ki te patisipe nan divès reyinyon pou te arete oubyen touye defen an. Nan tout temwanyaj yo, Badio fè kwè gen nan moun yo ki te menm vinn ak lide touye a.
Pami non moun li site yo nou jwenn: ansyen direktè jeneral lapolis la, Léon Charles, ansyen kòdonatè enfrastrikti palè nasyonal, Ardouin Zéphirin, ansyen sekretè jeneral Konsèy minis yo, Rénald Luberice, ansyen premye minis Claude Joseph. Genyen tou Louis Gonzague Edner Day ki se ansyen minis enteryè ak kolektivite teritoryal, epi 2yèm vis prezidan nan tèt Konsèy Siperyè Polis Nasyonal la (CSPN), Francis Cinéus, epi Christian Emmanuel Sanon.
Pou ansyen Dg lapolis la, Léon Charles, Badio fè konnen li se moun ki pa t konn neglije patisipe nan plizyè reyinyon ki te konn ap fèt e ki te gen pou objektif arete prezidan Jovenel Moïse. Yon lòt kote, direktè egzekitif Rezo Nasyonal k ap Defann Dwa Moun (RNDDH) nan, Pierre Esperance li menm tou te lonje dwèt li an premye sou Léon Charles pou di se responsab sekirite nasyonal yo ki te livre prezidan an. Li te fè deklarasyon sa nan odisyon l te gen ak majistra a jou ki te 5 jiyè 2023 a.
Sepandan, nan òdonans jij la li di klè Léon Charles malgre tout apèl detrès li te resevwa bò kote prezidan an, li pa t voye pèsonn alevwa pou l ta deplase prese prese pou t al sove lavi chèf leta a. Se pou sa, jij la di se lòt travay direktè a t ap fè.
“Menm jan enspektè Jacques Sincère ki te chèf operasyon USGPN te toujou an kontak ak asayan tankou James Solage ak Joseph Vincent menm jou ansasinay prezidan Jovenel Moïse la. Se konsa tou, li te konn ap pase kòmandan an chèf li, Léon Charles ki pi wo pase l telefòn nan tou pou te pale ak menm asayan li t ap pale yo“, daprè sa k ekri nan òdonans la.
Nan ka pa Ardouin Zéphirin an, temwanyaj Félix Badio yo fè konprann mesye a te nan menm kan avèk ansyen premye minis Claude Joseph, ansyen depite Gary Bodeau, ak ansyen premye dam nan Martine Moïse. Se yon kan, selon òdonans la ki te dwe konsève Claude nan tèt primati a epi pou te òganize eleksyon aprè depa Jovenel Moïse.
Malgre òdonans la montre Zéphirin te gen relasyon ak prezidan an e te menm konn vwayaje ak li nan kad pwogram Karavan Chanjman an, akize nimewo 1 an te deklare jij Walter Wesser Voltaire li te bliye nimewo l. Tandiske, avan sa nonsèlman li te deklare li te wè l pèdi plizyè apèl chèf leta a san rele l aprè, men tou nan 3è nan maten 7 jiyè 2021 an, li te resevwa apèl madanm Martine Moïse kote yo pa t menm pale koze dram ki te tou pote lavi prezidan an ale a.
Badio fè konnen ansyen minis Louis Gonzague Edner Day li menm te patisipe plizyè fwa nan reyinyon ki konn ap fèt sou arestasyon premye sitwayen peyi a. Sa ki fè jij la li menm nan òdonans la, di li doute pou Gonzague ta sou tèt Direksyon imigrasyon ak emigrasyon pou l ta fè pòz li pa t konnen anyen sou antre ak sòti etranje sou teritwa nasyonal la.
Nan ka pa Francis Cinéus la li menm, anplis endis yo ki pèmèt jij Voltaire fè lyen pou di li se yon gwo sèvo tou menm jan ak Jhon Joël Joseph, James Solage, Joseph Vincent, Emmanuel Sanon. Mete sou sa, jij la fè konprann li se moun ki te konn toujou la nan reyinyon yo e te konn ap jwe nan tèt lòt yo pou mete divès plan estratejik an plas pou te pran pouvwa epi bay prezidan an koudeta.
Men tou daprè temwanyaj Joseph Félix Badio, mesye a jan jij la di li a se youn nan sèvo kle nan ansasinay 58yèm prezidan an. Se yon pawòl ki pa diferan ak ka pastè epi politisyen Christian Emmanuel Sanon li prezante kòm moun ki te pi plis ap ankouraje lide touye a.
Pou enplikasyon ansyen sekretè jeneral konsèy minis yo, Rénald Luberice, sispèk kle a fè tout moun konnen te gen bouch pa gou ant prezidan an avèk mesye Luberice. Li jistifye kòz sa douvan majistra a konsa, pou di Luberice te gen pwòp pwojè politik li kote l te prefere pou ansyen sekretè jeneral palè nasyonal la, Lyonel Valbrun olye premye minis Ariel Henry nan tèt primati a.
Boutofen, Félix Badio revele tou Rénald Luberice te konn patisipe li menm tou nan kèk reyinyon ankachèt ki te gen menm objektif arete epi retire Moïse nan tèt leta a.
Atik sa se pwopriyete prive ©️ Gwoup Medya MAGHAITI 2024
