Nan yon dokiman yo sòti ayè jedi 7 mas 2024 la, Fondasyon Je Klere (FJKL), fè konnen nan atak ki te fèt nan penitansye samdi 2 mas la, tout polisye DAP yo te chape poul yo epi te kite baryè yo tou louvri depi nan 7è nan aswè. Selon sa fondasyon an di, ta dwe gen yon gwo ankèt ki mennen sou zak sa, puiske yo poko ka detèmine si se atak Bon Repo a ki te demantibile ajan yo oubyen si se te chwa yo oswa se te plan yo menm ak gwoup gang yo.
“Tout polisye Direksyon Administrasyon Penitansyè yo (DAP) ki te nan prizon an te bandone pòs yo epi te kite baryè yo louvri nan anviwon 7è nan aswè 2 mas 2024 la. Alòske depi 4è nan maten, prizonye ki te nan blòk Titanik yo te kase tout kadna selil yo a“, daprè sa FJKL revele.
Se premye zak abandon, selon FJKL ki ta pral bay baryè lib pou prizonye yo sove, paske yo fè konnen depi lè sa pati ki rele
“Titanik” nan prizon an prizonye yo te gentan kase tout kadna. “N ap sinyale Titanik se pi gwo katye prizon an epi se li ki fèt pou pi gwo bandi yo. Kèk prizonye te an kontak avèk kèk nonm deyò prizon an. Gwoup entèvansyon ki te gen misyon pou sekirize anndan prizon an yo menm tou te about epi te bandone batay la, sitou lè yo konnen sekirite deyò a te gentan kaba“, se toujou pawòl responsab fondasyon an.
Konsa, yo fè konnen se menm gwoup prizonye sa yo ki ta pral fòme klan pou al louvri selil pou chèf yo youn aprè lòt. Gwoup lasalin nan te louvri pou Herve Bonnet Barthélemy alyas Bout Janjan, Simon Pele te ale libere Jouma Albert alyas Zouma, e yo di aprè sa te gen divès machin deyò a ki t ap tann prizonye sa yo puiske te gen kominikasyon ant anndan ak deyò sant kaseral la. Yo peze pou yo di “tout chèf gang ki arete yo te gen klan yo nan Penitansye Nasyonal”.
Se daprè tout planifikasyon sa yo, FJKL li menm montre poukisa ki fè pi gwo prizon peyi a te vin prèske vid san pa te gen okenn rezistans, ni san bandi yo pa te menm bezwen antre anndan an pou t ale fè plis dega.
Fondasyon Je Klere fè kwè pa te gen twòp diferans pou prizon Kwadèboukè a, kote menm evade penitansye t al ede kraze l tou, sa ki fè tout 1 030 prizonye ki te ladan yo sove. Pandantan sa, aprè atak la yo mansyone, tout polisye te blije chape poul yo tou paske yo pa te jwenn bal alevwa pou ranfò. Se nan konsa responsab yo fini pou di, pou sèlman lannuit 2 mas 2024 la, rive gen antou 4 726 kriminèl, kadejakè, teyoris ki gaye nan lanati epi ki vin ogmante volim ensekirite a.
Atik sa se pwopriyete prive ©️ Gwoup Medya MAGHAITI 2024
