Kèk tan aprè plizyè bal te pèse divès pati nan batiman fakilte medsin ak famasi nan lannuit jedi pase a, etidyan yo nan pale yo te fè ak laprès jodi vandredi premye septanm nan, mande Leta pou pran responsabilite l pou frennen zak banditis nan peyi a.
“Nou pa gen lòt peyi nou ka ale, n ap mande pou Leta ak tout chèf polis la pran responsabilite yo. Paske nou menm nou vle etidye, nou vle lapè, nou vle aprann pou demen pou n ka sèvi peyi nou“, se deklarasyon youn nan etidyan sila yo ki pa t mete dlo nan bouch li pou te denonse gouvènman ayisyen an.
Mete sou sa, plizyè nan yo fè konnen se refijye yo ye tou akòz vyolans bandi ak zam ap fè nan zòn Kafoufèy depi plis pase yon semèn. Konsa, menm si yo konsyan ni gouvènman an, ni responsab polis peyi a pap tande vwa yo, yo fè konnen y ap toujou mande yo sa paske se yo ki la pou asire tout dwa popilasyon an.
N ap raple se pandan etidyan yo t ap prepare egzamen nan espas Fakilte a nan lannuit jedi 31 dawout la aksyon sila a pase. Kote divès videyo montre mak bal yo ki te rive ateri nan lakou a, sou kèk mi ak nan kafeterya fakilte a.
Atik sa se pwopriyete prive ©️ Gwoup Medya MAGHAITI 2023
