Administrasyon Biden nan bay yon èd militè ki nan 60 milyon dola ak 115 machin pou misyon miltinasyonal la ayè 4 me 2024 la,. nan lide pou konbat vyolans k ap ravaje peyi D Ayiti pandan plizyè ane, selon jounal Politico rapòte avèk nou.
Pami peyi nan kominote entènasyonal la, Etazini deside kopere avèk Ayiti nan kad misyon miltinasyonal sa. Misyon sa ap gen pou sou kontwòl peyi Kenya, peyi tankou Jamayik, Bayamas ak lòt ankò ap voye sòlda pa yo tou. L ap gen pou voye divès materyèl tankou plizyè zam, 80 machin Humvees ak 35 machin Maxxpro, dwon pwofesyonèl.
Yo fè konnen kèk nan materyèl sa yo gentan rive deja nan peyi a. Responsab yo soulinye ekipman sa yo pral ede Polis Nasyonal la nan batay kont bandi ak zam nan peyi D Ayiti, sitou nan zòn metwopolitèn Pòtoprens lan.
N ap raple sekretè Deta adjwen ameriken an, Todd D. Robinson ki responsab Biwo Entènasyonal Estipefyan ak Aplikasyon Lalwa te deklare premye twoup yo pa lwen vini. Li te menm presize nan dat 3 me 2024 la, polisye yo ap vini nan menm moman prezidan Kenyan an, William Ruto ap gen pou rive Etazini.
Atik sa se pwopriyete prive © Gwoup Medya MAGHAITI 2024
